Avropa Maskı cəzalandırır - Yayda məlum olacaq
Avropa İttifaqı (Aİ) tənzimləyici orqanları İlon Maska məxsus “X” sosial media platformasına dezinformasiya qanunlarını pozduğuna görə 1 milyard dollardan çox cərimə tətbiq etməyə hazırlaşır.
Sfera.az “The New York Times” nəşrinə istinadən xəbər verir ki, platforma təkcə cərimə ilə deyil, həm də məhsul üzərində məcburi dəyişikliklərlə üzləşə bilər.
Bunun səbəbi isə “X”in qanunsuz məzmun və dezinformasiyaya qarşı mübarizə aparmağı tələb edən mühüm qanuna (Rəqəmsal Xidmətlər Aktına) əməl etməməsidir.
Təhlükəli presedent sayıla biləcək bu cəza yayda açıqlanacaq və Aİ-nin yeni qanunvericiliyi çərçivəsində ilk dəfə olaraq tətbiq olunacaq. Məqsəd isə digər texnologiya şirkətlərinə də xəbərdarlıq edərək onları oxşar qanun pozuntularından çəkindirməkdir.
Qeyd edək ki, Avropa Komissiyası tərəfindən “X” platforması ilə bağlı araşdırma 2023-cü ildə başlanıb və ötən il ilkin qərarda platformanın Rəqəmsal Xidmətlər Aktını pozduğu bildirilmişdi. Cərimənin ABŞ-la Aİ arasında gərginliyi daha da artıracağı gözlənilir.
Xatırladaq ki, İlon Mask ABŞ-da Prezident Donald Trampın yaxın müşavirlərindən biri hesab olunur.
Fidan Hacızadə
