"Məcburi köçkünlər ödənişsiz təhsil alacaq"

Dövlət ali təhsil müəssisələrində ödənişli təhsil alan məcburi köçkünlər ödənişsiz təhsillərini davam etdirəcəklər.

Sfera.az-ın məlumatına görə, bunu Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov bildirib.

Ə.Həsənov xatırladıb ki, 2004-cü ildə Azərbaycan prezidenti İlham Əliyevin sərəncamı ilə dövlət ali təhsil müəssisələrində ödənişli təhsil alan məcburi köçkünlər ödənişdən azad olunub: "Bu sərəncam qüvvədə qalır. Yəni, dövlət ali təhsil müəssisələrində ödənişli təhsil alan məcburi köçkünlər ödəniş ödəməyəcəklər”.

Baş nazirin müavini qeyd edib ki, bundan başqa məcburi köçkünlər şəxsiyyət vəsiqəsi alınan zaman rüsumdan azaddırlar: "Yəni, onların bu imtiyazları qüvvədə qalır. Eyni zamanda onlar gəlir vergisinin kiçik bir hissəsindən azaddırlar. Həmçinin, 1992-1998-ci illərdə özlərindən asılı olmayaraq hansısa mənzillərə daxil olub yaşayanların mənzillə təmin olunana qədər oradan çıxarılması da yolverilməzdir. Bununla bağlı verilən bütün sərəncamlar qüvvədə qalır”.