Ticarət müharibələri ABŞ-yə zərər verir: “Hegemon mövqeyini itirəcək”
Donald Trampın hakimiyyətə gəlməsindən sonra ABŞ beynəlxalq ticarətdə yeni bir müharibəyə başlayıb. Prezident Tramp bir neçə ölkəyə qarşı idxal rüsumlarını artırıb və bu addımlar digər ölkələr tərəfindən oxşar tədbirlərlə cavablandırılıb. Belə vəziyyət, yalnız ABŞ iqtisadiyyatına deyil, həm də qlobal bazarlara mənfi təsir göstərir. Birjalarda səhmlərin qiymətləri düşür ki, bu da iqtisadi böhranın başlanğıcı kimi qiymətləndirilir.
İqtisadçılar və politoloqlar bu ticarət müharibəsinin ABŞ ilə yanaşı dünyada ciddi fəsadlar yaradacağı ilə bağlı xəbərdarlıqlar ediblər.
Sfera.az-a açıqlama verən şərhçi Elçin Xalidbəyli bildirdi ki, Trampın bu siyasəti çox təhlükəli və destruktivdir.
Onun sözlərinə görə, Trampın qərarları bütün dünyanı ABŞ-yə qarşı yönəltməyə başlayıb və bəzi ölkələr artıq ABŞ-ni düşmən kimi görməyə başlayıb:
"Trampın rəhbərliyi altında ABŞ digər ölkələrə qarşı hegemon və imperialist siyasət yürüdür. Xüsusilə, NATO ölkələri və Avropa İttifaqı üzvlərinə qarşı təzyiq göstərən ABŞ bu addımları ilə özünün hegemon mövqeyini gücləndirməyə çalışır. Lakin bu təzyiqlərin əksinə, dünya ölkələri arasında reaksiyalar yaranır və ABŞ-nin bu siyasətinə qarşı qarşı fəaliyyət genişlınir ".
E.Xalidbəyli düşünür ki, Tramp ticarət müharibəsini yaratmaqla güclü ölkələri öz təsiri altına almağa çalışır:
"Tramp NATO-dakı müttəfiqlərin və digər ölkələrin onun təzyiq siyasətinə qarşı çıxmağa cəsarət etməyəcəklərini düşünür. Lakin əksinə oldu, bu ölkələr artıq ABŞ-nin ticarət müharibəsinə cavab verir və ticarət müqavilələrini yenidən gözdən keçirirlər. Hətta bəzi ölkələr ABŞ-nin tətbiq etdiyi rüsumlara qarşı qarşılıqlı tədbirlər görməyə başlayıblar ki, bu da ABŞ iqtisadiyyatına ciddi zərbə vurur".
Xalidbəyli bu prosesin, ABŞ-nin beynəlxalq təsirini zəiflədəcəyini və qlobal iqtisadiyyatda qeyri-sabitlik yaradacağını bildirir. O həmçinin qeyd edib ki, Tramp administrasiyasının ticarət müharibəsi siyasəti ABŞ-nin iqtisadiyyatına ağır zərbə vurmağa başlayacaq və ABŞ öz qlobal hegemon mövqelərini itirəcək.
Bəsti Rəfizadə
