Rusiyanın Avropaya qaz satışından gəliri AZALDI - SƏBƏB
2024-cü ilin 11 ayının nəticələrinə əsasən, Rusiyanın Avropa İttifaqı (Aİ) ölkələrinə satdığı təbii qazdan əldə etdiyi ümumi gəlir 2023-cü ilin eyni dövrü ilə müqayisədə 7,9 faiz azalıb.
Sfera.az xəbər verir ki, bununla bağlı məlumatı Avropa Statistika Xidməti (Eurostat) açıqlayıb. Yanvar-noyabr aylarında Aİ ölkələri boru kəmərləri vasitəsilə Rusiyadan ümumilikdə 6,7 milyard avro dəyərində qaz alıb.
Qazın əsas hissəsini Slovakiya alıb. Slovakiya Rusiyadan 1,2 milyard dəyərində yanacaq alaraq Rusiyanın Avropaya qaz ixracında 20 faiz paya sahib olub. Rusiyanın Avropaya qaz ixracından gəliri azalsa da, satılan qazın həcmi azalmayıb, əksinə bir qədər artıb.
Rusiya 2024-cü ilin ilk 11 ayında əvvəlki ilin eyni dövrünə nisbətən 16 faiz çox həcmdə qaz satıb. Avropa Rusiyadan mayeləşdirilmiş təbii qaz (LNG) da alır. Boru kəmərləri ilə satılan qazda olduğu kimi, maye qaz satışında da gəlir azalıb. 2024-cü ilin ilk on bir ayında maye qaz satışından gəlir 15 faiz azalaraq 6,3 milyard avro olub.
Beləliklə, qeyd edilən dövrdə Rusiyanın Avropaya qaz satışından əldə etdiyi ümumi gəliri 13 milyard avro təşkil edib.
Qeyd edək ki, Rusiyanın Aİ-yə satdığı qazdan gəlirin azalması qiymətlərin enməsi ilə bağlıdır.
Vasif
Sfera.az
