"Bu saziş regionda yeni gərginliyə səbəb olacaq" - Politoloq
ABŞ və Ermənistan arasında imzalanan strateji tərəfdaşlıq sazişi müzakirə obyektinə çevrilib. Bu addımın mümkün nəticələri gündəmdədir.
Bununla bağlı Sfera.az-a açıqlama verən politoloq İlyas Hüseynov deyib ki, sözügedən saziş regionda ciddi müzakirə olunur:
“Biz artıq Rusiyanın xarici işlər naziri Sergey Lavrovun mətbuat konfransında buna reaksiya verdiyini də gördük.Qeyd etmək lazımdır ki, bundan öncə ABŞ və Ermənistan arasında tərəfdaşlıq yönündə dialoq sazişi imzalanmışdı. İndi bunu strateji tərəfdaşlıq sazişi səviyyəsinə qaldırırlar. Əlbəttə bu, hər bir ölkənin suveren seçimidir. Lakin məsələ bundan ibarətdir ki, Rusiya-Ukrayna müharibəsi fonunda Cənubi Qafqazda maraqların savaşının şahidiyik. Belə olan halda, Ermənistan vasitəsilə Avropa İttifaqı, ABŞ regiona müdaxilə etmək cəhdlərini ifadə edirlər. Nəzərə almaq lazımdır ki, Ermənistan Rusiya ilə müttəfiqlik münasibətlərinə malikdir. İrəvanın İran və Türkiyə ilə sərhədlərini Rusiya sərhədçiləri qoruyur. Ermənistanda Rusiyanın "102-ci hərbi baza"sı mövcuddur. Bu ölkə Avrasiya İqtisadi Birliyinin və KTMT-nin üzvüdür. Belə olan halda, ABŞ-nin Ermənistanla strateji tərəfdaşlıq sazişi imzalaması regionda yeni gərginliyə səbəb ola bilər”.
Müsahibimizin sözlərinə görə, Trampın andiçmə mərasimindən əvvəl bu sazişin imzalanması sanki ABŞ-də Demokratların Ermənistan qarşısında müəyyən öhdəliklər götürdüyünü, onu icra etməyə cəhd göstərdiyini deməyə əsas verir:
“Bu, gələcəkdə Ermənistan və Rusiya arasında daha sərt və kəskin münasibətlərə gətirib çıxara bilər. Nəticədə Rusiya bazasının Ermənistanı tərk etməsi, Avropa İttifaqının mülki missiyası adı altında regiona yerləşən qüvvələrin NATO bazasına çevrilməsi və Ermənistanın anti-Rusiya sanksiyalarına qoşulması prosesi baş verə bilər. Bunlar mümkün ssenarilər içərisindədir və bu barədə Kremldə də düşünməlidirlər. Sadəcə olaraq bunu bir sənəd kimi gözdən keçirmək sadəlövhlük olar, bu istiqamətdə müəyyən addımlar atılmalıdır. Region dövlətləri də bu məsələyə ayrı-ayrılıqda reaksiya verməlidirlər”.
Günay Rəsulqızı
