“TikTok” Elon Maska satılacaq? - Şirkətdən AÇIQLAMA

Məşhur sosial media platforması olan “TikTok”un ABŞ-dəki əməliyyatlarının dünyanın ən varlı adamı olan Elon Maska satıla biləcəyi ilə bağlı yayılan iddialara Çin şirkətindən cavab gəlib. 
 

Sfera.az xəbər verir ki, çinli şirkət “TikTok”la bağlı iddiaları “tam uydurma” adlandırıb. 

Xatırladaq ki, bir müddət öncə “Bloomberg” Çin rəsmilərinin “TikTok”un ABŞ-dəki əməliyyatlarını dünyanın ən zəngin adamına satmağı düşündüyünə dair xəbər yaymışdı. “TikTok”un sözçüsü “BBC News”a deyib ki, şirkət sırf uydurma olan şeylər barədə şərh vermək istəmir. 

Qeyd edək ki, şirkət ABŞ-dəki əməliyyatlarını satmayacağını əvvəllər dəfələrlə açıqlayıb. “Bloomberg” məsələ ilə bağlı məlumatlı olan mənbələrə istinadən xəbər verib ki, ABŞ Ali Məhkəməsi “TikTok” qadağasını təsdiq edərsə, Çin səlahiyyətliləri tətbiqin ABŞ-dəki əməliyyatlarını Elon Maskın sosial media platforması olan “X” ilə birləşdirməyi düşünür. Lakin bu ssenarinin yalnız danışıqlar mərhələsində olduğu bildirilib. 

ABŞ Ali Məhkəməsi yanvarın 19-dək “TikTok”la bağlı qərarını elan edəcək. Böyük ehtimalla, xarici ölkə vətəndaşına məxsus olan “TikTok”un ABŞ-dəki əməliyyatlarının məhdudlaşdırılmasına dair qərar qəbul ediləcək. Bu halda, “TikTok”un ABŞ-də istifadəsi tədricən çətinləşəcək. 

Vasif

Sfera.az