Elektrikli avtomobil satışlarında REKORD - Bu ölkə liderdir

Böyük Britaniyada yerləşən “Rho Motion” araşdırma şirkəti tərəfindən açıqlanan məlumatlara əsasən, 2024-cü ildə dünyada elektrikli avtomobil satışlarında rekord qeydə alınıb.

Sfera.az xəbər verir ki, qlobal elektrikli avtomobil satışları keçən il 2023-cü illə müqayisədə 25 faiz artıb. Belə yüksək artımdan sonra illik satışlar 17,1 milyon ədədə yüksəlib.

Regionlar üzrə götürsək, Avropa bazarında elektrikli avtomobil satışları keçən il 2023-cü ilə nisbətən 3 faiz azalaraq 3 milyon olub. ABŞ və Kanadada satışlar 9 faiz artıb və 1,8 milyona çatıb.

Elektrikli avtomobil satışlarının yarıdan çoxu Çində olub. Ötən il Çində satışlar illik müqayisədə 40 faiz artaraq 11 milyona çatıb. 2024-cü ildə ölkədə elektrikli avtomobil satışlarının üçdə birindən çoxu BYD modelləri olub ki, bu da onu ən çox satılan elektrikli avtomobil markasına çevirib.

Beləliklə, ötən il dünyada satılan elektriklə işləyən avtomobillərin 11 milyonu Çində, 3 milyonu Avropada, 1,8 milyonu ABŞ və Kanada bazarlarında, 1,3 milyonu isə dünyanın qalan hissəsində olub. Dünyanın digər yerlərində 1,3 milyonluq satış sayı 2023-cü ilə nisbətən 27 faiz artım deməkdir.

Vasif

Sfera.az