Ermənistanın Avrasiya İttifaqından çıxması Rusiya ilə münasibətlərə necə təsir edəcək? - AÇIQLAMA

Xəbər verdiyimiz kimi, Ermənistan hökuməti avrointeqrasiya kursunu rəsmən elan edib. Dünən Avropa İttifaqına üzvlük haqqında qanun layihəsi hökumət tərəfindən parlamentə göndərilib.

Bununla bağlı Sfera.az-a açıqlama verən politoloq Məhəmməd Əsədullazadə xatırladıb ki, Ermənistan Rusiyanın orbitində Avrasiya İttifaqının, Kollektiv Təhlükəsizlik Müqaviləsi Təşkilatının (KTMT), Gömrük İttifaqının üzvüdür:

“Nikol Paşinyan Avropa İttifaqına üzvülük sənədini təsdiqləməklə, Moskvaya qarşı yeni cəbhə açmış oldu. Avropa İttifaqına üzvülük üçün Paşinyan Rusiyanın orbitində olan bütün təşkilatlardan rəsmən çıxmalıdır. Ermənistanın Avrasiya İttifaqı daxilində Rusiya ilə iqtisadi əməkdaşlığa görə, ötən il 15 milyard ticarət dövriyyəsi olub. Bu, İrəvan üçün kifayət qədər böyük bir rəqəmdir. Paşinyan Avrasiya İttifaqından çıxmaqla, iqtisadi əlaqələri tam zəiflədəcək”.

Ekspert bildirdi ki, proseslər nəticəsində Ermənistan iqtisadiyyatında kifayət qədər problemlər yaranacaq:

“Həmçinin Rusiya Ermənistana qarşı iqtisadi və siyasi təzyiqlərə əl atacaq, proses hər iki ölkənin münasibətlərinin kəskinləşməsi ilə davam edəcək. Əsl həngamə isə Ermənistanın üzvü olduğu təşkilatlardan çıxmaq barədə qərarlar qəbul edəndə olacaq. Bu il rəsmi İrəvan üçün çətin və mürəkkəb bir mərhələ başlayır”.

Günay Rəsulqızı