Ukraynanın xarici borcu ARTIR: “Bataqlıqdan” necə qurtulacaq? – ÜÇ SSENARİ

Rəsmi məlumatlara görə,  Ukraynanın xarici borcu 2024-cü ilin ikinci rübündə 169 milyard dolları keçib. Bu isə istər-istəməz özlüyündə müəyyən suallar yaradır. Yəni, Ukrayna getdikcə batdığı borc bataqlığından neçə çıxacaq? 

Bununla bağlı Sfera.az-a açıqlama verən iqtisadçı Eldəniz Əmirov deyib ki, 2014-cü ildə Rusiyanın Krımı ilhaq etməsindən bu günə qədər, yəni 2014-2024-cü illər arasında Ukrayna beynəlxalq maliyyə təşkilatlarından aldığı borc təxminən 45-50 milyard dollar, Avropa İttifaqından və digər ölkələrdən aldığı vəsait də oxşardır:

“Eyni zamanda Kiyev 50 milyardlıq avro həcmində müxtəlif formalı maliyyə yardımları alıb.  Ukraynanın Ümumi Daxili Məhsulu (ÜDM)  isə 2023-cü ildə 207 milyard dollar olub.  Bu artıq xarici borcun ÜDM-in 80%-ni keçməsi deməkdir. Gələn ilin sonuna qədər isə borcun səviyyəsinin iqtisadiyyatın həcmini keçmə ehtimalı böyükdür. Çünki Ukrayna bir neçə gün əvvəl Avropa İttifaqından 35 milyard avro məbləğində yardım almaq üçün kredit sazişi imzalayıb. Noyabrın 28-də bu təşəbbüs çərçivəsində Kiyev artıq 18.1 milyard avro alıb. Deməli, artıq borc 200 milyard dollar yaxınlaşır. Hesab edirəm ki, iqtisadiyyatı ayaqda saxlamaq, müharibəni davam etmək və digər məqsədlər üçün Ukraynaya hələ daha yüz milyardlarla dollar lazım olacaq”.

İqtisadçı qeyd edib ki, Ukraynanın borclarını necə qaytaracağına gəldikdə isə, problem 3 ssenari üzrə həll edilə bilər:

“Pis ssenari odur ki, Ukraynanın bütövlüyü və suverenliyi ilə bağlı real risklər ortaya çıxa bilər. Orta ssenari budur ki, Qərb Ukraynının bu borcunun qaytarılması üçün şəraitin yaradılması üçün müharibədən sonra borcun yenidən strukturizasiyasını apararaq əlverişli zaman möhlətləri təqdim edilə bilər. Ukrayna üçün yaxşı ssenari isə bu olardı ki, Rusiyanın dondurulmuş valyuta ehtiyatları vasitəsilə Ukraynanın borcları ödənilsin.  Amma bütün bunların əsasında müharibənin nə zaman və hansı nəticələrlə bitməsi dayanır. Müharibə Rusiyanın qələbəsilə bitərsə, o zaman tamamilə fərqli vəziyyət və fərqli ssenari yaranacaq”.

Günay