Donald Trampa qarşı üçüncü sui-qəsd iddiası yayılıb.

Sfera.az bildirir ki, bu barədə Riversayd dairəsinin şerifi Çad Bianko mətbuata açıqlama verib. Daha əvvəl iki sui-qəsd cəhdindən sağ çıxan ABŞ-nin keçmiş Prezidenti Donald Trampın Kaliforniyada keçirdiyi seçki mitinqindən əvvəl silahlı şəxsin tutulduğu bildirilib.

“Dünən Trampın seçki mitinqinin keçiriləcəyi ərazidən yarım kilometr aralıda polis nəzarət məntəqəsində saxlanılan avtomobilə baxış zamanı mitinqə saxta giriş kartı, qanunsuz yolla əldə edilmiş ov tüfəngi, tapança aşkar edilib. Vem Miller adlı 49 yaşlı şübhəlinin sağçı anti-hökumət təşkilatının üzvü olduğuna və Trampı öldürməyi planlaşdırdığına inanırıq. Yəqin ki, biz üçüncü sui-qəsd cəhdini dayandırdıq”.

Yerli mətbuatın verdiyi məlumata görə, saxlanılan Vem Miller qanunsuz silah saxlamaq ittihamı ilə mühakimə olunub və 5 min dollar girov müqabilində sərbəst buraxılıb.Eyni zamanda qeyd olunub ki, sözügedən şəxs Kaliforniya Universitetində magistr dərəcəsi alıb və 2022-ci ildə Nevada senatına namizədliyini irəli sürüb.

Xatırladaq ki, iyulun 13-də Pensilvaniyada keçirilən mitinq zamanı Metyu Kruks adlı şübhəli AR-15 tipli silahla Trampa sui-qəsd etməyə cəhd edib və güllə onun qulağına dəyib. Digər şübhəli Ryan Uesley Rout isə sentyabrın 15-də Floridada qolf oynayarkən respublikaçı namizədə sui-qəsd cəhdinə görə tutulub.

Günay