Qızını 48 il əvvəl itirən ana hökumət və Uşaq Evinə qarşı təzminat davası açdı

48 il əvvəl qızı yoxa çıxan ana hökuməti və uşaq evini məhkəməyə verib. 2019-cu ildə edilən DNT testi nəticəsində itkin qızına qovuşan qadın, hadisədə səlahiyyətlilərin səhlənkarlığını əsas gətirərək, təzminat üçün məhkəməyə müraciət etdiyini açıqlayıb.

Sfera.az bildirir ki, 70 yaşlı cənubi koreyalı Han Tae-soon 4 yaşında ikən qaçırılan uşağının uşaq evinə aparıldığı, sonra isə övladlığa götürülmək üçün ABŞ-a göndərildiyi üzə çıxdıqdan sonra məhkəməyə müraciət etmək qərarına gəlib.


Seul Mərkəzi Rayon Məhkəməsi binası qarşısında jurnalistlərə açıqlama verən Han Tae-soon, Cənubi Koreya hökumətinin qızının övladlığa götürülməsinə mane ola bilmədiyi üçün məsuliyyət daşıdığını əsas gətirərək, təzminat tələbi ilə məhkəməyə müraciət etdiyini bildirib.


Düz 48 il əvvəl qızını itirən dərdli ana övladının itdiyini polisə bildirdikdən sonra illərlə ümidsizcəsinə qızını axtarıb. Bu müddət ərzində o, tez-tez polis idarələrinin və dövlət məmurlarının qapılarını döyüb.


Ananın vəkilləri qızın itkin düşdüyü bildirildikdən bir gün sonra polis tərəfindən müəssisəyə yerləşdirildiyini və uşaq evinin valideynlərini tapmaq üçün heç bir səy göstərmədiyini iddia edir.


40 ildən artıqdır qızını axtaran ana nəhayət ki, 2019-cu ildə keçirilən DNT testi nəticəsində qızını tapsa da, cinayətkarları tutmaq üçün qanuni mübarizəsini davam etdirir.

Aynil
Sfera.az