Narendra Modi Putinlə Ukraynadakı vəziyyəti müzakirə etdi

Hindistanın Baş naziri Narendra Modi və Rusiya Prezidenti Vladimir Putin Ukraynadakı vəziyyəti müzakirə ediblər.

Sfera.az bildirir ki, bu barədə Kremlin məlumatında qeyd olunub.  

“Narendra Modi Kiyevə son səfəri barədə məlumat verərək, Ukrayna ətrafındakı vəziyyətin mümkün siyasi və diplomatik yolla nizamlanmasına töhfə verməkdə maraqlı olduğunu vurğulayıb. Vladimir Putin isə Kiyev hakimiyyətinin və onların Qərb himayədarlarının addımlarından söz açıb”, - məlumatda bildirilib.

Rusiya lideri həmçini Ukrayna münaqişəsinin həllinə təsir edən əsas yanaşmalardan danışıb. Bundan əlavə, ölkələrin liderləri ikitərəfli əməkdaşlığı davam etdirmək barədə razılığa gəliblər.

Xatırladaq ki, Narendra Modi münaqişənin həlli üçün Rusiya və Ukrayna arasında vasitəçi kimi öz xidmətlərini təklif edə biləcəyini bildirmişdi. Onun sözlərinə görə, Hindistanın hər iki ölkə ilə yaxşı əlaqələri var və münaqişənin hər iki tərəfi ona etibar edir. 

Qeyd edək ki, Hindistan hakimiyyəti dəfələrlə münaqişənin həllinə kömək etməyə hazır olduğunu bildirib, lakin bunun üçün Rusiya Federasiyası və Ukraynanın razılığı lazımdır.

Günay