Trampın qardaşı oğlu seçkidə Harrisə səs verməyi planlaşdırır

ABŞ prezidentliyinə namizəd Donald Trampın qardaşı oğlu Fred Tramp prezident seçkilərində Kamala Harrisə səs verəcəyini bildirib.

Sfera.az xəbər verir ki, bu barədə "ABC News" məlumat yayıb.

Üstəlik, o, əmisi seçkidə qalib gəlsə, dəvət olunarsa, andiçmə mərasimində iştirak etmək istədiyini də deyib.

Telekanala müsahibə verən Fred Tramp qohumunu “nüvə dəlisi” adlandırıb və qeyd edib ki, onilliklər əvvəl onun üçün irqi söyüşlərdən istifadə etmək adi hal olub. Bununla belə, o, şəxsən Donald Trampın irqçi olduğuna inanmadığını etiraf edib.

Qeyd edək ki, Fred Tramp Donald Trampın böyük qardaşının oğludur.

Xatırladaq ki, ABŞ-də prezident seçkiləri 2024-cü il noyabrın 5-də keçiriləcək. ABŞ-nin keçmiş prezidenti Donald Tramp Respublikaçılar Partiyasından namizədliyini irəli sürüb.

Ehtimal edilirdi ki, ABŞ-nin hazırkı prezidenti Co Bayden Demokratlar Partiyası tərəfindən namizəd göstəriləcək. Lakin iyulun 21-də o, yarışdan çıxdığını elan edib və vitse-prezident Kamala Harrisin namizədliyini dəstəkləyib.

İnci
Sfera.az