Dünya nəhəngləri arasında GƏRGİNLİK ARTIR: Çin ABŞ ilə nüvə danışıqlarını DAYANDIRDI
![Dünya nəhəngləri arasında GƏRGİNLİK ARTIR: Çin ABŞ ilə nüvə danışıqlarını DAYANDIRDI](https://sfera.az/photo/orginal/2024/07/18/1721308071_abs-cin-qarsidurmasi-yeni-baslayir.jpg)
Çin demokratik yolla idarə olunan və öz ərazisi olduğunu iddia etdiyi Tayvana silah satışına cavab olaraq ABŞ ilə silahlara nəzarət və nüvə silahlarının yayılmasına dair danışıqları dayandırıb.
Sfera.az xarici KİV-ə istinadən xəbər verir ki, Çin Xarici İşlər Nazirliyinin elan etdiyi qərar Çin və ABŞ arasında gərginliyin artdığı bir vaxtda nüvə silahı ilə bağlı erkən danışıqları dayandırıb.Belə ki, Birləşmiş Ştatlar Tayvanın əsas beynəlxalq tərəfdaşı və ən böyük silah təchizatçısıdır.
Nümayəndələr Palatası iyun ayında Çinə qarşı hərbi çəkindirməni gücləndirmək üçün Tayvana 500 milyon dollarlıq xarici hərbi maliyyələşdirməni, həmçinin 2 milyard dollar kredit və kredit zəmanətini təsdiqləyib.Bundan başqa, Birləşmiş Ştatlar Tayvanın F-16 döyüş təyyarələri üçün 300 milyon dollarlıq ehtiyat hissələri müqaviləsini də təsdiqləyib.
"Çin tərəfi ABŞ ilə silahlara nəzarət və yayılmama mövzusunda məsləhətləşmələrin yeni mərhələsini təxirə salmağa qərar verdi. Məsuliyyət tamamilə ABŞ-nin üzərinə düşür", -Çin Xarici İşlər Nazirliyinin sözçüsü Lin Jian bildirib.Lin Jian deyib ki, Çin beynəlxalq silahlara nəzarət üzrə ünsiyyəti davam etdirməyə hazırdır, lakin ABŞ Çinin əsas maraqlarına hörmət etməli, dialoq və mübadilə üçün lazımi şərait yaratmalıdır.
ABŞ Dövlət Departamentinin sözçüsü Metyu Miller Çini “Rusiyanın yolu ilə getməkdə” ittiham edib:
"Biz hesab edirik ki, bu yanaşma strateji sabitliyi pozur və silahlanma yarışı dinamikası riskini artırır".
Qeyd edək ki, Çinin 500 nüvə başlığına malik olduğu təxmin edilir, lakin ABŞ Müdafiə Nazirliyi Pekinin 2030-cu ilə qədər mindən çox nüvə başlığı istehsal edəcəyini gözləyir.
Çin Xarici İşlər Nazirliyinin məlumatına görə, ABŞ və Çin son 5 ildə ilk dəfə noyabr ayında silah müzakirələri aparıb.Bu danışıqlarda nüvə silahının yayılmaması müqaviləsi və digər nüvə təhlükəsizliyi məsələləri, həmçinin Bioloji Silahlar Konvensiyasına və Kimyəvi Silahlar Konvensiyasına əməl olunması, kosmik təhlükəsizlik və silahlara müntəzəm nəzarət məsələləri müzakirə edilib.Donald Tramp ABŞ-nin Tayvana dəstəyinin gələcəkdə daha baha başa gələ biləcəyinə işarə etsə də, Çinin Tayvanı işğal edəcəyi təqdirdə ABŞ-nin Tayvanı müdafiə edib-etməyəcəyi ilə bağlı suallardan yayınıb.
Firuzə Əliyeva