Yenidən prezident olmaq istəyən Lyayen: "Aİ-ni müdafiə birliyinə çevirəcəyik"
![Yenidən prezident olmaq istəyən Lyayen: "Aİ-ni müdafiə birliyinə çevirəcəyik"](https://sfera.az/photo/orginal/2024/07/18/1721295496_ursula_von_der_leyen_100521.jpg)
Avropa Komissiyasının prezidenti Ursula von der Lyayen Aİ-ni müdafiə birliyinə çevirməyi vəd edib.
Sfera.az bildirir ki, müvafiq məlumat sözügedən qurumun saytında yerləşdirilib. Bildirilib ki, Avropa Komissiyasının rəhbəri kimi daha bir müddətə namizəd olmaq istəyən Lyayen növbəti beş il ərzində qeyd olunan məsələyə yönələcəyini vurğulayıb.
O əlavə edib ki, Aİ-yə üzv dövlətlər həmişə öz qoşunlarına görə məsuliyyət daşıyacaqlar: “Ancaq müdafiə sənayesi bazası, innovasiyalar və vahid bazarı gücləndirmək səylərini dəstəkləmək və əlaqələndirmək üçün Avropanın edə biləcəyi çox şey var”.
Lyayen həmçinin müdafiə üzrə Avropa komissarı təyin etməyi planlaşdırır. O, vəzifəyə gəldikdən sonra ilk 100 gün ərzində AK-daki müvafiq həmkarları ilə birlikdə “Avropa Müdafiəsinin Gələcəyinə dair Ağ Sənəd” təqdim edəcəyinə söz verib. Qeyd olunub ki, sənəddə Aİ-də müdafiə məsələlərinə yeni yanaşma prinsipləri göstəriləcək və bununla bağlı tələb olunan investisiya sahələri sadalanacaq.
Lyayen son olaraq, Avropa Parlamentinin üzvlərini “güclü Avropa qurmaq” üçün onu ikinci müddətə AK rəhbəri kimi təsdiqləməyə çağırıb: “Biz dəniz, quru, hava, kosmos və kiber domenlərdə qabaqcıl müdafiə texnologiyalarına sərmayə qoyaraq Avropa Müdafiə Fondu yaradacağıq”.
Günay