Əslən azərbaycanlı olan Pezeşkiyan İranda seçkilərdə liderdir - İLKİN NƏTİCƏLƏR

İranda dünən keçirilən növbədənkənar prezident seçkilərindəki səsvermədən sonra bülletenlərin sayılması davam edir. 

Sfera.az Anadolu Agentliyinə istinadən xəbər verir ki, İran Daxili İşlər Nazirliyinin Seçki Mərkəzinin sözçüsü Möhsin İslami səsvermə qutularının gecə yarısı açıldıqdan sonra 14 milyon 70 min 642 səsin hesablandığını açıqlayıb. 

Səslərin 5 milyon 955 min 781-ni və ya 42,3 faizini islahatçı qanaddan olan keçmiş səhiyyə naziri Məsud Pezeşkiyan, səslərin 5 milyon 560 min 321-ni və ya 39,5 faizini İranın mənəvi liderinin respublikanın Ali Milli Təhlükəsizlik Şurasındakı nümayəndəsi, mühafizəkar Səid Cəlili toplayıb. 

Məhəmməd Bağır Qalibaf  13,4 faiz səslə üçüncü, Mustafa Purmuhammedi isə 0,8 faizlə dördüncü yerdədir. Namizədlər birinci turda seçilmək üçün “50+1” faiz səs toplamalıdırlar. Birinci turda “50+1” faizdən çox səs toplayan namizəd olmazsa, ən çox səs toplayan 2 namizəd ikinci tura keçəcək və iyulun 5-də keçiriləcək ikinci turun qalibi 9-cu prezident olacaq. 

Qeyd edək ki, ən çox səs toplayan Məsud Pezeşkiyan əslən azərbaycanlıdır. 

Vasif