5,9 bal gücündə zəlzələ oldu, sunami XƏBƏRDARLIĞI EDİLDİ
Bu ilin əvvəlində bir sıra güclü zəlzələlərin baş verdiyi Yaponiyanın İşikava prefekturasında 5,9 bal gücündə zəlzələ qeydə alınıb.
Sfera.az xəbər verir ki, bu barədə Yaponiya Meteorologiya Agentliyi məlumat yayıb.
Zəlzələnin episentri Noto yarımadası ərazisində, ocağı isə 10 kilometr dərinlikdə yerləşib.Tələfat və dağıntılar barədə məlumat verilməyib, sunami xəbərdarlığı edilib, lakin zəlzələdən bir neçə dəqiqə sonra xəbərdarlıq ləğv edilib. İlk zəlzələdən 10 dəqiqə sonra eyni ərazidə eyni maqnitudada daha bir zəlzələ baş verib. Sakinlərə daha çox zəlzələ ehtimalı ilə bağlı xəbərdarlıq edilib, sakit və ayıq-sayıq olmağa çağırılıb.
Yaponiya enerji şirkətləri bildiriblər ki, silsilə güclü zəlzələlər yerli nüvə obyektlərində heç bir fövqəladə vəziyyətə səbəb olmayıb. Xüsusilə, ölkədə zəlzələlərin baş verdiyi bölgədə yerləşən Kaşivazaki-Kariva və Şika Atom Elektrik Stansiyalarında heç bir fövqəladə vəziyyət və ya fon radiasiya səviyyələrində dəyişiklik baş verməyib.
Qeyd edək ki, yanvarın 1-dən etibarən Yapon dənizi sahilində İşikava prefekturasının Noto yarımadası yaxınlığında müxtəlif maqnitudalarda silsilə zəlzələlər baş verib. Onlardan ən güclülərinin maqnitudası 7,6 olub və güclü sunamiyə səbəb olub. Təbii fəlakət nəticəsində 240-dan çox insan həlak olub, 1100-dən çoxu yaralanıb. Ümumilikdə 38 min 600 ticarət, inzibati və yaşayış binası tamamilə və ya qismən dağılıb.
Firuzə Əliyeva
