Akşener İYİ partiya sədrliyinə namizəd OLMAYACAQ - Özü AÇIQLADI
Türkiyədə İYİ Partiyanın hazırkı sədri Meral Akşener növbədənkənar qurultayda sədrliyə namizəd olmayacaq.
Sfera.az bildirir ki, o, bu barədə mətbuata yazılı açıqlama verib. Akşener fikirlərini bu cür qeyd edib:
“30 illik siyasi fəaliyyətim boyu ölkəmizin gələcəyi, millətimizin əmin-amanlığı, dövlətimizin rifahını yaxından maraqlandıran bir çox məsələlərlə bağlı qərarlar verməli, münasibət bildirməli oldum. Bu qərarları qəbul edərkən həmişə şəxsi maraqlarımı, qısamüddətli potensial qazancımı və edilən istənilən “cəlbedici” təklifləri bir kənara qoyaraq, sahib olduğum mənəvi dəyərlərə, Cümhuriyyətimizin təməl prinsiplərinə və Türkiyənin ehtiyaclarına diqqət yetirdim. Qəbul etdiyim hər qərarın düzgünlüyü həmişə qısa müddətdə olmasa da, zamanla sübuta yetirildi. 31 mart 2024-cü il Yerli İdarəetmə seçkiləri öncəsi İYİ Partiya olaraq səlahiyyətli şuralarımızın qərarına uyğun olaraq seçkilərə sərbəst və müstəqil şəkildə daxil olmağı seçdik. Bu qərarı verərkən, partiyanın lideri olaraq, potensial olaraq əldə edə biləcəyimiz mənfi seçki nəticəsi riskini və buna görə də bədəl ödəməli olduğumuzu yaxşı bilirdim. Bu səbəbdən bütün proses boyu hər fürsətdə nəticələrə görə məsuliyyət daşıdığımı vurğuladım. Şəxsən mən seçkinin nəticələri çərçivəsində ödədiyimiz bədəldən razıyam. Çünki dünən olduğu kimi bu gün də millətimin, dövlətimin, ölkəmin xeyrinə nəyin bahasına olursa-olsun bədəl ödəyəcəm. Bu kontekstdə bəyan edirəm ki, seçkiləri yekunlaşdıracağımız və 2028-ci ilə qədər marşrutumuzu müəyyən edəcəyimiz növbədənkənar seçkili qurultayımızın sədrliyinə namizəd olmayacağam”.
Qeyd edək ki, son prezident və parlament seçkilərindəki məğlubiyyətdən sonra dağılan Millət İttifaqının ortaqlarından olmuş İYİ Partiya bu yerli seçkilərdə bütün ittifaq təkliflərindən imtina etmiş, seçkilərə "azad və müstəqil" formada qatılacağını bəyan etmişdi. Partiya seçki dövründə funksionerlərinin iqtidarla yanaşı, müxalifətin də ünvanına kəskin təniqidi ritorikası ilə seçilirdi.
Günay
