Fransanın xarici işlər naziri Stefan Sejurne Parisdə ABŞ Dövlət katibi Entoni Blinkenlə birgə mətbuat konfransında fürsətdən istifadə edərək, Azərbaycan əleyhinə təbliğat aparıb. Belə ki o, Ermənistanın “ərazi bütövlüyünə” Azərbaycan tərəfindən “təhdid olduğunu” iddia edib.

Rəsmi Bakıdan Ermənistanın “ərazi bütövlüyünə” heç bir təhdid yoxdur. Dünən Azərbaycan Silahlı Qüvvələrinin Naxçıvan istiqamətindəki mövqelərinin Ermənistan tərəfindən atəşə tutulmasını çıxsaq, iki ölkənin şərti sərhədində sabitlik hökm sürür. Bundan başqa, Ermənistanla Azərbaycan arasında sülh prosesi, habelə sərhədlərin delimitasiyası davam edir.

Belə bir vəziyyətdə S.Sejurnenin Ermənistanın “ərazi bütövlüyünə” Azərbaycan tərəfindən “təhdid olduğunu” iddia etməsi onun timsalında ölkəsinin növbəti qərəzli, ikili standartlara hesablanmış türkofob, islamofob, azərbaycanofob siyasətinin göstəricisidir. Aprelin 5-də Brüsseldə baş tutacaq görüşdən əvvəl belə bir açıqlamanın verilməsi bir daha bu görüşün rəsmi Bakının əleyhinə olduğunu sübut edir.

Rəsmi Bakının sülhdə maraqlı olması, maksimum konstruktiv mövqe sərgiləməsi və gərginlikdən yayınması başda Fransa olmaqla regionda maraqlı olan qüvvələri narahat edir. Sülhün əldə edilməsi bu ölkələrin regiona müdaxilə, buranı təsirdə saxlamaq imkanlarını sıfırlayır.

Reallıq ondan ibarətdir ki, Fransa Cənubi Qafqazda kövrək sülhü pozmağı və regionu yeni münaqişə ocağına çevirmək istəyini nümayiş etdirir. Fransa uzun müddətdir ki, Ermənistanı silahlandırır. Bunun müdafiə xarakterli silahlar olduğu deyilsə də, NATO üzvü olmayan ölkələrə satışı qadağan edilən silahları Ermənistana təmənnasız verir.

Fransa Azərbaycanı ittiham etməkdənsə, Afrika və Yaxın Şərqdə həyata keçirdiyi aqressiv kolonializm siyasətinin gətirdiyi fəlakətlərdən nəticə çıxarmalı, öz müstəqilliyinə qovuşmaq istəyən koloniyalarda fəallara qarşı təzyiq, təqib və cəzalandırma metodlarından, həmin xalqların müstəqillik uğrunda mübarizələrinə qarşı aqressiv tədbirlərdən əl çəkmək haqqında düşünməlidir.

Əslində, bu gün Fransanın Azərbaycana qarşı qəzəb və aqressiv siyasətinin bir səbəbi də budur. Rəsmi Bakı Fransanın Afrika və Yaxın Şərqdə həyata keçirdiyi aqressiv kolonializm siyasətini ifşa edir, reallığı dünya ictimaiyyətinə təqdim edir. Bundan başqa, Fransanın Korsika, Yeni Kaledoniya kimi ərazilərin öz müqəddəratını təyin etməsinə mane olmasına etiraz edir. Azərbaycanın yanaşması beynəlxalq hüquq və insan haqları prinsiplərinə, rəsmi Parisin mövqeyi isə ikili standartlara, qərəzə dayanır.

Müəllif: Politoloq Turan Rzayev