\"İnfarktın geniş yayılmış əlamətlərindən biri də...\" - Həkimdən XƏBƏRDARLIQ!
Son illərdə infarktın yaşı gəncləşib. Əvvəllər infarkt orta yaş problemi sayılsa da, indi gənclər, hətta yeniyetmələr infarkt səbəbiylə həyatlarını itirirlər.
Bəs infarktın əsas əlamətləri hansılardır?
Mövzu ilə bağlı Sfera.az-a danışan ürək-damar həkimi Elşən Rzayev bildirib ki, infarktın əsas 7 əlaməti mövcuddur.
"Sinədə ağrılar ən çox rast gəlinən əlamətlərdən biridir. Bu ağrılar səbəbiylə təcili tibbi yardıma müraciət edənlərin 70 faizi infarktın astanasında olur. Həmin ağrılara dözən insanlar isə həyatlarını riskə atırlar. Ağrıların müddəti 20 dəqiqəni keçirsə bu, infarktın əlamətidir. Ağrı kürəkdə başlayıb sonra sinəyə yayılırsa, bu da infarktın əlaməti sayılır. Bəzən kürək ağrısı təkbaşına infarktın xəbərçisi ola bilir. Məhz bu baxımdan kürək ağrılarına etinasız yanaşmaq düzgün deyil. Ürəyin alt hissəsində başlayan ağrılar diafraqma vasitəsilə mədəyə yayılır. Mədədə başlayan ağrını qarın ağrısı kimi hiss edirik. Bu ağrı getdikcə kəskinləşirsə, həkimə müraciət etmək vacibdir. Sol qolda başlayan qəfil ağrılar, sinədə basılmalar da müşayiət edilirsə infarktdan şübhələnmək olar".
Həkim qeyd edib ki, soyuq tər infarktın geniş yayılmış əlamətlərindən biridir.
"Ürək döyüntüsünün artması, nəfəs almaqda çətinlik də infarktın yüksək risk qrupuna daxil olan əlamətləri hesab edilir. Bu əlamətlərin birini belə hiss etdikdə mütləq şəkildə həkimə müraciət etmək lazımdır".
Ülkər Abdurahmanlı
