Qeyri neft-qaz ixracında ciddi azalma baş verib – MÜQAYİSƏ

Bu il Azərbaycanın qeyri neft-qaz ixracında nəzərəçarpacaq azalma müşahidə edilir. Son illərdə həcmi davamlı artan qeyri neft-qaz mallarının ixracında yalnız 2 ayda 200 milyon dollardan çox azalma baş verib. 

Sfera.az xəbər verir ki, 2023-cü ilin yanvar-fevral aylarında 651,4 milyon dollar dəyərində qeyri neft-qaz malları satılmışdı. Bu ilin eyni dövründə ixracın dəyəri 455 milyon dollara geriləyib. İki ayda yaranan fərq 196,4 milyon dollar və ya 30,2 faiz olub.

İxracın azalmasının əsas səbəbi elektrik enerjisi satışının kəskin azalmasıdır. Ötən ilin ilk 2 ayında xaricə 227,2 milyon dollarlıq elektrik enerjisi satıldığı halda bu il satış həcmi 35 milyon dollara geriləyib. Yalnız elektrik enerjisi satışında yaranan azalma 192 milyon dollar olub. 

Azərbaycandan elektrik enerjisini əsasən 2 ölkə - Türkiyə və Gürcüstan alır. Bu il elektrik enerjisi ixracının kəskin azalması həmin ölkələrin idxalı azaltması ilə bağlıdır.  
Elektrik enerjisi ilə yanaşı kimya sənayesi məhsullarının ixracı 6 milyon dollar azalaraq 48 milyon dollara, plastmass və onlardan hazırlanan məmulatların satışı 19 milyon dollar azalaraq 57 milyon dollara enib. 

Vasif