"Zəfər Günü 20 sentyabra keçirilsin" - Qüdrət Həsənquliyev

“2023-cü ilə əsasən deyə bilərik ki, iqtisadiyyatda durğunluq dövrü olub, ciddi uğurlar əldə edə bilməmişik”. 

Sfera.az xəbər verir ki, bunu Milli Məclisin bugünkü iclasında deputat Qüdrət Həsənquliyev deyib.

“2023-cü ildə sərhədlər bağlı olub. Adambaşına düşən ümumi məhsulun həcmi 2.1 faiz olub. Bu, Avropadan on dəfə azdır” deyən Q.Həsənquliyev bildirib ki, əgər islahatlara gedilməsə, avropalılar kimi yaşamaq vətəndaşlara xəyal olaraq qalacaq.

“Bildiyimiz kimi, noyabr ayında COP29 Bakıda keçiriləcək. Bilmək istərdim ki, nə qədər pul xərclənəcək. Velosiped yolları çəkilir, amma digər yandan köşklərdə siqaretlər reklam olunur. Qanuna görə, bu kimi məhsulların reklamı qadağandır, lakin məhəl qoyulmur”, - millət vəkili qeyd edib.

Q.Həsənquliyev təklif edib ki, 20 sentyabr “Uğur Günü” və ya “Qələbə Günü” kimi qeyd olunsun, ya da Zəfər Günü 20 sentyabra keçirilsin.

Deputat həmçinin taksilərin sayının 40 min azaldılmasına da fikir bildirib. Onun sözlərinə görə, belə bir qərarın qəbul edilməsi yolverilməzdir. Bakı şəhərində ən azından minimum 3 min avtobus olmalıdır. Hər şeydən öncə ictimai nəqliyyat inkişaf etdirilməlidir”.

Firuzə Əliyeva