"Ermənistan Rusiya qarşıdurmasında məsafə saxlamaq lazımdır" - Əkrəm Baydəmirli

"Bu gün Rusiya bizim qarşımızda və həmçinin yanımızda deyil. Yaxın gələcəkdə vəziyyət dəyişə bilər, Rusiya öz əyaləti kimi baxdığı bu ölkə ilə münasibətləri normallaşdıra bilər. O baxımdan, Ermənistan Rusiya qarşıdurmasında mütləq məsafə saxlamaq lazımdır".

Sfera.az xəbər verir ki, bu barədə fikirləri Sosial Rifah və Tədqiqatlar İctimai Birliyinin sədri Əkrəm Baydəmirli bildirib.

“Danılmaz tarixi faktdır ki, bu regiona erməniləri Rusiya gətirib. Azərbaycan torpaqlarında onlara dövlət yaradıb və Azərbaycana qarşı bir təzyiq vasitəsi kimi istifadə edib. Amma bu gün dünyanın siyası arxitekturası dəyişir. Bu proseslərdə Ermənistandan alət kimi istifadə edən qüvvələr var. Aydın məsələdir ki, bu işin arxasında Qərbin strateji planları, bizim bilmədiyimiz qüvvələrin gizli hədəfləri durur”.

Ə. Baydəmirli qeyd edib ki, Ermənistan Rusiyaya qarşı psixoloji müharibə cəbhəsi açmaqla, Moskvanın əsəblərini tarıma çəkmək, onu Ukrayna müharibəsindən qisməndə olsa yayındırmaq istəyir.

“Bu, bizi əsla narahat etməməlidir. Azərbaycanın hədəfi qazandığı tarixi zəfəri qorumaqla, qardaş Türkiyə ilə birlikdə qarşıya qoyduğu strateji hədəflərə çatmaq olmalıdır. Həmin strateji hədəflər, nəhəng layihələr regiona Azərbaycanın milli maraqları çərçivəsində sabitlik, inkişaf gətirəcək”.

Ülkər Abdurahmanlı