İran yenidən ABŞ-nin HƏDƏFİNDƏ: Bayden İordaniyadakı hücuma necə cavab verəcək?
Yanvarın 28-i İordaniyanın şimal-şərqində pilotsuz uçuş aparatı ilə ABŞ hərbi bazasına hücum edilib. Hadisə nəticəsində 3 amerikalı əsgər həlak olub. Son məlumata görə, xəsarət alan hərbçilərin sayı isə 34-ə çatıb. Digər tərəfdən, İranın BMT-dəki nümayəndəsi hücumla əlaqələrinin olmasını təkzib etsə də, İraqda fəaliyyət göstərən Tehran dəstəkli qruplaşma, məsuliyyəti üzərinə götürüb.
Maraqlıdır, ABŞ-nin İrana cavabı necə olacaq?
Bununla bağlı Sfera.az-a açıqlama verən siyasi şərhçi Zeynal Əmrəliyev deyib ki, İordaniyada ABŞ bazasına edilən son hücum yeni və daha böyük regional gərginliyin müjdəçisidir:
“ABŞ-də əksər siyasi qüvvələr Bayden administrasiyasından birbaşa İranın hədəfə alınmasını istəyir. Respublikaçılar vəziyyətdən istifadə etmək istəyirlər. Bu, Tramp üçün əla fürsətdir. Bayden bu dəfə də əməlli addımlar atmasa, bu, onun imicinə çox pis təsir edəcək. ABŞ-nin bəzi siyasi rəsmiləri İran ərazisinin bombalanmalı olduğunu düşünür. İnanmıram ki, Bayden seçki öncəsi buna getsin”.
Ekspert bildirib ki, artıq Bayden administrasiyası İran dəstəkli regional qruplara qarşı əməliyyata başlamağa məcburdur:
“Bayden İran qarşında sakit durmaqla Donal Trampı Ağ Evə çox yaxınlaşdırır. Ümumiyyətlə, Yaxın Şərqdə yeni və daha güclü hərbi əməliyyatları görmək ehtimalı böyükdür. ABŞ-nin hizbullah və husilərə qarşı geniş əməliyyata başlaması an məsələsidir”.
Günay
