Böyük Britaniya hökuməti elektron siqaretlərin satışını qadağan edəcək.

Sfera.az “Reuters”ə istinadən xəbər verir ki, Böyük Britaniyanın Baş naziri Rişi Sunak bu gün elektron siqaretlərin satışında hansı qadağaların tətbiq ediləcəyini açıqlayacaq. Qeyd olunub ki, hökumətin məhdudiyyətlərə getməsinin səbəbi uşaqların elektron siqaretlərdən istifadəsinin qarşısının alınmasıdır.

Yeni qaydalara əsasən, elektron siqaret növləri azaldılacaq və qablaşdırmalar uşaqları daha az cəlb edəcək şəkildə sadələşdiriləcək. Məlumata görə, siqaret Britaniyada hər dörd nəfərdən birində xərçəng xəstəliyinə və ildə təxminən 80,000 ölümə səbəb olur. Hazırda 11-15 yaş aralığındakı yeniyetmələrin 9%-i elektron siqaretlərdən istifadə edir. Bunun gənclər arasında nikotin asılılığına səbəb ola biləcəyi ilə bağlı narahatlıq var.  

Qeyd edək ki,  Sunak oktyabr ayında yeni qanun qəbul etməyi planlaşdırdığını da bildirib. Qanuna əsasən, 2009-cu il yanvarın 1-i və ondan sonra doğulanlar həyatı boyu tütün məmulatları ala bilməyəcək.  Eyni zamanda, sağlamlıq faydaları ilə yanaşı, elektron siqaretlərin qadağası ətraf mühitin qorunmasına kömək edəcək və hər həftə beş milyon zibil azalacaq.

Xatırladaq ki, Ümumdünya Səhiyyə Təşkilatı da (ÜST) dekabr ayında elektron siqaretlərin qadağan edilməli olduğunu söyləyib. 

Firuzə Əliyeva