“Sehrli xalat”ın vəfat edən məşhur aktyoru haqda MARAQLI FAKTLAR

Xəbər verdiyimiz kimi, “Sehirli xalat” filmindəki "Rəşid" obrazı ilə məşhurlaşan aktyor Azər Qurbanov vəfat edib.

Sfera.az Azər Qurbanov haqqında maraqlı faktları təqdim edir:

Əslən Gəncə şəhərindən olan A. Qurbanov 1955-ci ildə Balakən rayonunda anadan olub. Orta təhsilini Bakıda 225 saylı orta məktəbdə rus dilində alıb. Sonra 8 il Moskvada təhsil alıb və Sankt-Peterburqda, Odessada yaşayıb. Buna görə də, o, Azərbaycan dilində demək olar ki, danışa bilməyib. Aktyor 7 yaşında “Bir məhəllədən iki nəfər” filmində çıxış edib. Daha sonra “Əcnəbi qız” (1965), “Bizim oynadığımız dənizdə” (1967), ilk sovet-yuqoslav birgə filmi olan “Mavi quş, yolun açıq olsun” (1967) filmlərində rol alıb.

Ona ən böyük uğuru “Sehrli xalat” filmindəki pioner “Rəşid” obrazı gətirib. Azər rusdilli olduğundan onu Yusif Şeyxov səsləndirib. Bakıda cəmi on il yaşayan Azər Qarabağ münaqişəsi başlananda, yenidənqurma vaxtı dostlarının dəvəti ilə ABŞ-yə gedib. Ancaq səfər qısa müddətlik olsa da, Azər ABŞ-də qalmağa qərar verib. Orada şəxsi bizneslə məşğul olan Azər onlayn satışla məşğul olub. Həmçinin, o, fiziki məhdudiyyətli şəxslərin həkimə, xəstəxanaya aparılmasına yardım edən şirkətin sahibkarı olub. 1983-cü ildə elə Amerikada ailə həyatı quran Azərin bir oğlu dünyaya gəlib. Azərin qardaş və bacısı Bakıda qalmağa üstünlük versə də, anası ABŞ-yə köçüb . 2012-ci ildə onun anası ABŞ-də dünyasını dəyişib və orada dəfn olunub.

Firuzə Əliyeva