Xəbər verdiyimiz kimi, Bakı və Sumqayıt arasında ekspress avtobuslar fəaliyyətə başlayıb.

Bununla bağlı Sfera.az-a açıqlama verən nəqliyyat məsələləri üzrə ekspert Ərşad Hüseynov deyib ki, bu, irəliyə doğru atılan ciddi addımdır: “Lakin görüləcək işlər hələ çoxdur. İki şəhər arasında təkcə vağzaldan-vağzala sərnişindaşıma ciddi uğur gətirməyəcək. Bu iki şəhərə vahid aqlomerasiya kimi, vahid mobillik zonası kimi baxılmalıdır. On minlərlə insan gündəlik olaraq bu iki şəhər arsında gedib-gəlir. Ya təhsil, ya iş, ya da digər məsələlərə görə... Ona görə də Sumqayıtın bir neçə yerindən Bakının bir neçə yerinə və əksinə ictimai nəqliyyat təşkil edilməlidir”.

Ekspert bildirib ki, daha kiçik tutumlu, ehtiyac olan istiqamətdə isə həm də iri tutumlu avtobuslar, ekspress marşrutlar yaradılmalıdır: “İki şəhər arasında qatarla daşıma imkanları da yaxşılaşdırılmalıdır. Əks təqdirdə, Bakı-Sumqayıt arasında hərəkət edən fərdi avtomobillər və taksilərlə səyahət sayını azaltmaq asan olmayacaq. Nəzərə alınmalıdır ki, müasir insan üçün təkcə gediş haqqı yox, həm də yola sərf edilən zaman vacibdir”.

Günay