İsrail bu müddətədək müharibəyə davam edəcək - Netanyahudan sərt AÇIQLAMA

İsrail Həmas üzərində tam və qəti qələbədən başqa heç nə qəbul etməyəcək, ona görə də döyüşlər bütün cəbhələrdə davam edəcək.
 

Sfera.az RİA Novosti-yə istinadən xəbər verir ki,  bunu İsrailin baş naziri Benyamin Netanyahu bildirib.

“Müharibə qarşıya qoyduğumuz bütün məqsədlərə çatana qədər bütün cəbhələrdə davam edəcək... Daha çox aylar çəkəcək, amma biz qələbəyə nail olmaq əzmindəyik... İsrail mənim rəhbərliyimlə bundan azıyla kifayətlənməyəcək. Mütləq qələbə. Bu, sadəcə zərbə vurmaq deyil, HƏMAS-a qarşı tam qələbəyə nail olmaqdır”,- Netanyahu mətbuat konfransında deyib.

Fələstinin HƏMAS hərəkatının hərbi qanadının elan etdiyi Əl-Əqsa tufanı əməliyyatı çərçivəsində oktyabrın 7-də İsrail Qəzza zolağından görünməmiş miqyaslı raket hücumuna məruz qalıb. Bundan sonra təşkilatın döyüşçüləri İsrailin cənubundakı sərhəd bölgələrinə daxil olub, burada həm hərbçilərə, həm də mülki şəxslərə atəş açıb, həmçinin 200-dən çox insanı girov götürüb. İsraildə, səlahiyyətlilərin son məlumatlarına görə, təxminən 1,2 min adam öldürülüb, bu rəqəmə mülki vətəndaşlar, əsgərlər, xarici vətəndaşlar və işçilər daxildir, həmçinin 5 mindən çox adamın yaralandığı bildirilir.

Buna cavab olaraq İsrail Müdafiə Qüvvələri Qəzza zolağında HƏMAS-a qarşı əməliyyata başlayıb. Bir neçə gün ərzində İsrail hərbçiləri Qəzza ilə sərhədə yaxın bütün məskunlaşma məntəqələrini nəzarətə götürüb və zolağındakı hədəflərə, o cümlədən mülki şəxslərə hava zərbələri endirməyə başlayıb. İsrail həmçinin Qəzza zolağının tam blokadaya alındığını elan edib: su, qida, elektrik, dərman və yanacaq tədarükü dayandırılıb.

Həmas Qəzza zolağında təxminən 200-250 girov olduğunu iddia edib. Atəşkəs başa çatdıqdan sonra İsrail hakimiyyəti 126 israilli və 11 əcnəbinin HƏMAS-da girov qaldığını, oğurlanan 110 nəfərin isə sərbəst buraxıldığını açıqlayıb.

Əzizə