"Dünyanın ən güclü ordusu ABŞ ordusudur, Rusiya isə..." - Rus polkovnik

"Dünyanın ən güclü orduları ABŞ və Rusiya ordularıdır. Rusiya yalnız hərbi-sənaye kompleksinə əsas rəqibindən daha az maliyyə ayırdığına görə ikinci yeri tuta bilər". 

Sfera.az xəbər verir ki, bu fikirləri rusiyalı hərbi ekspert, istefada olan polkovnik Anatoli Matviyçuk bildirib.

O, Rusiyanın Ukrayna münaqişəsində qalib gələcəyi halda, vəziyyətin dəyişə biləcəyini deyib. 

“Dünyanın ən güclü ordularının reytinqləri hazırlanarkən çox şey nəzərə alınır. Bu, şəxsi heyətin, səfərbərlik resurslarının mövcudluğu, ordunun döyüş effektivliyi üçün iqtisadi rıçaqları təmin etmək, müharibənin tələb etdiyi kimi dəyişən vəziyyətə uyğunlaşmaq, taktika və silah dizaynını dəyişmək bacarıqlarıdır”, - Matviyçuk qeyd edib.

Hərbçi Böyük Britaniyanın beş ən güclü ordu siyahısından çıxmasını məntiqli hesab edib. Matviyçukun sözlərinə görə, ölkədə hərbi işlərdə, sənayedə, texnika və silah istehsalında geriləmə var.

“Biz maliyyə baxımından, həqiqətən, bir qədər geridəyik. Ancaq Ukraynada qalib gəlsək, bəlkə də birinci yeri tutacağıq. Hər halda, reytinqləri çox da ciddi qəbul etməzdim, çünki onlar çox siyasiləşib”, - polkovnik fikrini yekunlaşdırıb.

İnci