Çində laboratoriyada COVID-19-un mutant ştamı yaradılıb.

Sfera.az bildirir ki, GX_P2V kimi tanınan ölümcül virus, genetik quruluşu insanlara bənzəyən gəmiricilərin beyinlərinə yeridilib.

Bu barədə “New York Post” qəzeti ötən həftə Pekində dərc olunmuş araşdırmaya əsasən iddia irəli sürüb.

İddiaya görə, Çində aparılmış araşdırma viruslarla riskli eksperimentlər məsələsini gündəmə gətirir. Alimlər yeni növ koronavirusu sınaqdan keçirib. Virus genləri dəyişdirilmiş siçanlarda 100% ölümlə nəticələnmişdir.

Bu ölümcül virus 2017-ci ildə (pandemiyadan üç il əvvəl) Malayziya panqolinlərində aşkar edilmiş koronavirusun mutasiya edilmiş versiyasıdır (Panqolinlər - planetin isti bölgələrində yaşayan məməlilər).

Virusa yoluxmuş bütün siçanların hamısı cəmi səkkiz gün ərzində ölüb. Bu, tədqiqatçıların fikrincə, çox təəccüblü və sürətli ölüm nisbətidir.

GX_P2V siçanların ağciyərlərini, sümüklərini, gözlərini, traxeyalarını və beyinlərini yoluxdurub. Sonuncu ştamm heyvanların hamısının ölümünə səbəb olacaq qədər şiddətli olub. Ölümdən bir neçə gün əvvəl laboratoriya gəmiriciləri sürətlə arıqlayıb, defformasiyaya uğrayıb və son dərəcə ləng hərəkət ediblər. Son gündə isə hamısının gözləri tamamilə ağarıb.

Virusun insanlarda necə və ya hansı formada olacağı hələ məlum deyil. Tədqiqat siçanlar üzərində nəticələri potensial insan yoluxması ilə birbaşa əlaqələndirmir. London Universitetinin bəzi ekspertləri tədqiqatın faydasız olduğunu deyirlər.
 

Bu test, COVID-19-un yaradılması ilə bağlı olduğu iddia edilən Wuhan tədqiqatından tamamilə fərqlidir. Qeyd edək ki, COVID-19 koronavirus infeksiyasının mənşəyi hələ də dəqiq məlum deyil. Çində aparılmış bu yeni araşdırma isə riskli virus təcrübələri ilə bağlı çoxlu suallar doğurur.

Xatırladaq ki, yanvarın 17-də Çin alimləri ilk dəfə rezus meymunu uğurla klonlaşdırmağı bacarıblar. Tədqiqatçılar ilk dəfə olaraq insanlara bu qədər yaxın olan primat növünü klonlaşdırmağa müvəffəq olublar. Körpə sağlam “anadan olub” və iki ildən çox yaşayıb.

Aynil
Sfera.az