"Tesla"nın Berlindəki fabriki tədarük zəncirindəki problemlər səbəbindən istehsalı 2 həftə məhdudlaşdıracaq.

Sfera.az xəbər verir ki, Qırmızı dənizdəki hücumlar Avropa və Asiya arasında təchizat şəbəkəsinə ziyan vurur. 

Belə ki, Avropa iqtisadiyyatında bir müddət durğunluğa səbəb olacaq bu problem "Tesla"nın da istehsalı dayandırmasına səbəb olub.

Məlumata görə, "Tesla" 29 yanvar - 11 fevral tarixləri arasında "Giga-Berlin" fabrikində istehsalı əhəmiyyətli dərəcədə məhdudlaşdırmalıdır.

"Tesla"nın açıqlamasına görə, Qırmızı dənizdəki silahlı münaqişələr Asiya və Avropanın Ümid burnundan keçən gəmi marşrutuna böyük təsir edir. Göndərmə prosesinin uzanması səbəbindən istehsal xəttində boşluq yaranır. "Tesla"nın hansı hissələrinin çatışmadığını dəqiq bilinmir, lakin LGES tərəfindən istehsal olunan 2170 tipli silindrli litium-ion batareyalar da daxil olmaqla bir çox hissə Çində istehsal olunur.

Maraqlı tərəfi odur ki, tədarük problemindən təsirlənən bütün istehsalçılar arasında Tesla istehsalı məhdudlaşdıracağını elan edən ilk şirkət oldu. Müxtəlif sektorlara nəzər saldıqda istehsalda gecikmələr olanlar arasında İsveç mebel sənayesi də var.

Görünür, pandemiya və Ukrayna müharibəsindən sonra Qırmızı dənizdə baş verənlər Avropa iqtisadiyyatına daha bir zərbə vurur. Bu vəziyyət təchizat şəbəkələrinin Avropa üçün nə qədər əhəmiyyətli olduğunu ortaya qoyur. Qırmızı dənizdə Süveyş kanalını tamamilə bağlayacaq hər hansı bir hərəkət olmasa da, gəmilər Afrika və Ümid burnu ətrafında daha uzun marşrutla səyahətlərini tamamlamalıdırlar.

Firuzə Əliyeva