“Bank BTB” ASC-nin maliyyə vəziyyəti 2023-cü ildə bir qədər də pisləşib. 

Sfera.az bankın açıqladığı məlumatlara istinadən xəbər verir ki, il ərzində kredit təşkilatının aktivləri, məcmu kapitalı azalıb və bank ili zərərlə başa vurub. 

2022-ci ildə bankın 374,2 milyon manat aktivi var idi. Ötən ilin sonunda aktivlərin dəyəri 369,2 milyon manata düşüb. 

Aktivlərin azalmasında kredit qoyuluşunun azalması, həmçinin əsas vəsaitlərin, qeyri-maddi aktivlərin azalması rol oynayıb. 

Bank BTB-də depozitlərin həcmində də azalma müşahidə edilir. 2022-ci ildə 159 milyon manat depozit öhdəliyi olan bankın ötən ilin sonunda depozitlərinin həcmi 153 milyon manata geriləyib. 

Bankın maliyyə vəziyyətinin pisləşməsi onun gəlirlərinin azalmasında da özünü göstərir. Ötən il bank xalis mənfəət əldə edə bilməyib və ili 2,78 milyon manat zərərlə yekunlaşdırıb.

Bankın zərərə məruz qalması isə onun məcmu kapitalının azalmasına səbəb olub. 2022-ci ildə 47 milyon manat dəyərində kapitalı olan bank hazırda 44,3 milyon manat kapitala sahibdir. 

“Bank BTB” ASC-nin əsas səhmdarı Nigar Mehdiyevadır. N.Mehdiyeva Prezident Administrasiyasının sabiq rəhbəri, AMEA-nın keçmiş prezidenti Ramiz Mehdiyevin gəlinidir. Bankın digər səhmdarı Sadiq Rza isə N.Mehdiyevanın qardaşıdır.

Orxan