Türkiyə bankları da Rusiya ilə əlaqələri dayandırır – SƏBƏB

Türkiyə bankları Rusiya bankları ilə əməkdaşlıqdan imtina etməyə başlayıblar. 

Sfera.az xəbər verir ki, bununla bağlı məlumatı “Kommersant” maliyyə bazarındakı mənbələrə və xarici ticarət iştirakçılarına istinadən yazıb. 

Nəşrin həmsöhbətlərindən birinin sözlərinə görə, Türkiyə bankları ilə əməkdaşlığın məhdudlaşdırılması artıq xeyli müddətdir ki, müşahidə edilirdi. Lakin 2023-cü ilin sonunda vəziyyət xeyli pisləşib və Türkiyənin demək olar ki, bütün bankları oxşar davranışları sərgiləyirlər. 

2024-cü ilin yanvarın 1-dən isə Rusiyadan Türkiyəyə şirkətlərin pul köçürmələri dayanıb. Hətta bəzi banklar qəbul edilmiş əməliyyatların qadağan olunmuş mallarla bağlı olduğunu əsas gətirərək vəsaitləri geri qaytarıblar. 

Nəşrin yazdığına görə, əməliyyatların məhdudlaşdırılması məsələsi ABŞ-nin dövlət katibi Entoni Blinkenin yanvarın əvvəlində Türkiyəyə səfəri zamanı qaldırılıb və o, “sanksiyalardan yayınma və ixrac nəzarəti məsələlərinin həllinin” vacibliyini vurğulayıb. 

Türkiyənin bank sektorundakı mənbələrin verdiyi xəbərdə isə qeyd edilir ki, əməliyyatlarda fasilələr ABŞ Maliyyə Nazirliyinin Xarici Aktivlərə Nəzarət Ofisi (OFAC) tərəfindən görülən tədbirlərlə əlaqədardır. 

Xatırladaq ki, Türkiyə ilə yanaşı Çinin bəzi dövlət bankları da Rusiya ilə əlaqələri kəsir. Hər iki ölkə Rusiya ilə yaxşı münasibətlərə sahib olsa da, sanksiyadan yayınmaq üçün bankları əməliyyatları məhdudlaşdırırlar. 

Vasif