Boru partladı, bütün şəhəri qaynar su bürüdü - Yanıq xəsarəti alanlar var

Rusiyada daha bir qəza qeydə alınıb.
 

Sfera.az bildirir ki, Nijni Novqorodda boru qırılması səbəbindən şəhərin bir neçə küçəsini qaynar su basıb.Rusiya mətbuatı 1-2-ci dərəcəli yanıq xəsarəti alanların xəstəxanalara yerləşdirildiyini yazır. Həmçinin qəza səbəbindən 20-yə yaxın hündürmərtəbəli bina istiliksiz qalıb.

Xüsusilə, Slavyanskaya küçəsi daha çox zərər görüb; 700 mm-lik borudan qaynar sular ətrafa sıçrayıb. Bununla belə, bir neçə qonşu küçədə səkiləri və yol kənarlarını su basıb.


Rusiyanın Teleqram kanalları ikisi uşaq olmaqla 16 nəfərin yanıq xəsarətləri aldığını yazır. Yaralılar 1-2-ci dərəcəli yanıq xəsarətləri ilə xəstəxanaya yerləşdirilib. Əksəriyyətinin ayaqları yanıb. Qəzanın aradan qaldırılması üçün hadisə yerində qəza xidməti işləyir.


Hüquq-mühafizə orqanlarının əməkdaşları da hadisə yerində bütün halların müəyyənləşdirilməsi istiqamətində işləyirlər. Rusiya mediası cinayət işi açıldığını yazıb.

Qeyd edək ki, son bir ay ərzində Rusiyada bir çox kommunal nasazlıqlar baş verib, yüzlərlə ev və minlərlə sakin istilik enerjisiz və isti susuz qalıb.

Yanvarın 11-də Novosibirskdə boruların qırılması səbəbindən 230-dan çox yaşayış binası və obyektlər istilik təchizatsız qalıb. Qəza baş verən zaman havanın temperaturu -25 dərəcə olub.


Paytaxt Moskvanın da bir sıra yaşayış məntəqələri istiliksiz qalıb. Mənzillərdə havanın temperaturunun 13-15 dərəcə Selsi olduğu bildirilir.

Aynil

Sfera.az