ABŞ-də ermənipərəst namizəd seçki yarışından GERİ ÇƏKİLDİ – O, Trampa zəng edib nə dedi? 

“Tesla” və “SpaceX”in milyarder rəhbəri İlon Maskın ABŞ prezident seçkilərində dəstəklədiyi siyasətçi namizədlikdən geri çəkilib.

Sfera.az bildirir ki, respublikaçı biznesmen Vivek Ramasvami bu barədə qərarını açıqlayıb.

“Bloomberg”in xəbərinə görə, o, sabiq ABŞ Prezidenti Donald Trampa da zəng edib. “Mən onu Ayova ştatında respublikaçıların ön seçimlərində namizədliyi qazanması münasibətilə təbrik etdim. O cümlədən, Trampı prezidentlik yarışlarında dəstəklədiyimi bildirdim”, - Vivek əlavə edib.

Qeyd edək ki, ABŞ-də respublikaçıların praymerizi yanvarın 15-də Ayova ştatında başlayıb. İlkin səsvermənin nəticələrinə görə, Ramasvami cəmi 7,8 faiz səs toplaya bilib. Keçmiş prezident Donald Tramp təxminən 52 faiz səslə liderdir. İkinci yerdə isə Florida ştatının qubernatoru Ron Desantis qərarlaşıb. O, seçki yarışında iştirakını davam etdirmək niyyətində olduğunu açıqlayıb. Nəticələrə görə, BMT-nin keçmiş səfiri Nikki Heyli isə üçüncü yerdədir.

Xatırladaq ki, namizədliyini geri çəkən şəxs – Vivek Ramasvami ABŞ-də prezident seçkilərindəki debatlar zamanı Ukraynanın dəstəklənməsinə qarşı çıxıb. İş adamı həmçinin bəyan edib ki, Rusiya Federasiyası ilə Çin arasında müttəfiqlik Vaşinqton üçün ən böyük təhlükədir. Ramasvami həmçinin, erməni lobbisinə yaxınlığı ilə seçilir. O, keçmiş Qarabağ separatçılarının müdafiəçisi kimi də tanınır.

Günay