“Ermənistanın silahlanmasına biganə qala bilmərik” – AÇIQLAMA 

Ermənistanın baş naziri Nikol Paşinyanın sülh danışıqlarında vaxtı uzatmaq cəhdləri heç də əbəs deyil.

Sfera.az xəbər verir ki, bu barədə fikirləri Sosial Rifah və Tədqiqatlar İctimai Birliyinin sədri Əkrəm Baydəmirli bildirib.

Onun sözlərinə görə, ermənilər gedən geosiyasi proseslərin dəyişəcəyinə, özləri üçün əlverişli şəraitin yaranacağına ümid edərək, həm Azərbaycanla sülh müqaviləsinin imzalanmasını yubadır, həm də bacardıqları qədər silahlanmağa çalışırlar:

“Hətta bəzi erməni politoloqları da Ermənistanın sürətlə silahlanmasını əsaslandırmağa çalışırlar. Lakin biz Ermənistanın silahlanma məsələsinə biganə baxa bilmərik”.

Əkrəm Baydəmirli bildirib ki, II Dünya müharibəsində bütün beynəlxalq aləmə meydan oxuyan Almaniya və Yaponiya yekunda məğlub olublar. “Həmin adı çəkilən ölkələrə qarşı müharibə cinayətlərinə görə ciddi sanksiyalar tətbiq edilib. Həm Almaniya, həm də Yaponiya mütəşəkkil ordu saxlamaq səlahiyyətindən məhrum edilib. Həmin beynəlxalq təcrübə Ermənistan üçün də tətbiq edilməlidir”, - qeyd edib.

Ülkər Abdurahmanlı