ATAA rəsmisindən turizm bələdçilərinə: "Xaricdə ölkəmizin imicini yüksəldin"
"Hazırda ölkəmizdə bələdçilərimiz 27 dildə fəaliyyət göstərir".
Sfera.az xəbər verir ki, bunu Azərbaycan Turizm Bələdçiləri Assosiasiyasının baş katibi Tural Musayev Azərbaycan Turizm Agentlikləri Assosiasiyasının (ATAA) təşkilatçılığı ilə “Turizm sənaye subyektlərinin ilin yekunları və COP29 ərəfəsində çağırışlar” mövzusunda forumunda çıxışı zamanı deyib.
"Bələdçilərimiz turistləri sadəcə tarixi və gəzməli-görməli yerlərlə yox, həm də milli mətbəximiz, adət-ənənələrimizlə də tanış edirlər. Şuşa və Ağdam, eləcə də ətraf ərazilərə səyahətlər təşkil olunur.
Cari ilin noyabr ayında keçiriləcək COP29 tədbiri üçün həmkarım turizm bələdçilərinə tövsiyə etmək istərdim ki, onlar ölkəmizi təmsil edirlər buna görə də mütləq yaxşı hazırlaşmalıdırlar. Qonaqlarımızda Azərbaycan haqqında xoş təəssürat yaratmaqla yanaşı, xaricdə ölkəmizin imicini yüksəltməyə şərait yaratmalıdırlar. Turizm sadəcə iqtisadi artım deyil, həm də mədəniyyətlərin qarşılıqlı əlaqəsi və dostluq körpüsü yaratmağın bir yoludur.
Necə deyərlər, razı turist yenə turist gətirər".
Firuzə Əliyeva
