Xəbər verdiyimiz kimi, dekabrın 21-də Çexiyanın paytaxtında Çarlz Universitetində 24 yaşlı tələbə David Kozak atışma törədib,14 nəfər həlak olub.

 

Sfera.az bildirir ki, Çexiya polisi universitetdə baş verən kütləvi atışma ilə bağlı araşdırmaları davam etdirir.

Çexiya hakimiyyət orqanlarının fikrincə, 24 yaşlı oğlan tələbələrin silahla məktəbə gəldiyi Bryansk və Kazan faciələrindən ilhamlanıb. Polis əlavə edib ki, təqsirləndirilən şəxsin çoxlu sursat ehtiyatı olub.

Çexiya hakimiyyəti hücum edən tələbənin Telegram kanalında rusca yazdığı mesajlar arasında əlaqə yaratmağa başlayıb. David Kozakın Rusiyada baş verən kütləvi atışma hadisələrinin təsirinə məruz qalıb-qalmaması tezliklə məlum olmalıdır.


Telegram-dakı mesajlardan biri hadisənin Rusiyadakı terrorlarla əlaqəli ola biləcəyini təsdiqləyir. Misal olaraq, bu ilin dekabrında Bryanskda məktəbdə baş vermiş insidenti göstərmək olar. Ukrayna ilə sərhədə yaxın bir yerdə qız silahla təhsil müəssisəsinə gəlib.


Hadisə şahidlərinin sözlərinə görə, hadisə ikinci dərs zamanı baş verib. Alina adlı yeniyetmə evdən götürdüyü atasının silahından bir neçə dəfə atəş açıb, sonra intihar edib.
 

Materialda qeyd olunan ikinci hadisə 2021-ci ilin mayında Kazanda baş verib. 19 yaşlı İlnaz Qalyaviev Kazan məktəbində qətliam törədib. Nəticədə 9 nəfər ölüb, 20-dən çox insan müxtəlif dərəcəli bədən xəsarətləri alıb.
 

Dindirmə zamanı o, özünü Tanrı kimi dərk etdiyini və hamıya nifrət etməyə başladığını bildirib və buna görə də təhsil müəssisəsində qanlı terror aktı törətmək qərarına gəlib.
 

Praqada kütləvi atışma
Qeyd edək ki, atışma yerli vaxtla saat 15:00 radələrində Praqanın mərkəzindəki Karl Universitetinin İncəsənət fakültəsinin binasında baş verib. David Kozak binanın ortasında atəş açaraq insanları öldürüb. O, qurbanlarını seçməyib, təsadüfi atəşlər açıb.


Təhsil müəssisəsinin işçiləri və tələbələri sinif otaqlarına kilidləməyə, qapını mebellə bağlamağa məcbur olublar. Silaha tuş gəlməmək üçün tələbələrin pəncərələrin kənarından asılı qaldıqlarını göstərən görüntülər də internetdə yayılmışdı.
 

Bəzi məlumatlara görə, hücum edən şəxs, qırğını törətməzdən əvvəl öz atasını da öldürüb.
 

Bundan əlavə, bir müddət əvvəl Çexiyada Klanovitse meşəsində daha bir qətl hadisəsi baş verib. Bir kişi və bir körpə cəsədi aşkarlanıb. Çexiya polisinin rəhbəri Martin Vondraşek bildirib ki, istintaq David Kozakın bu faciədə əli ola biləcəyi versiyasını inkar etmir.


Yeri gəlmişkən, polis rəisi əlavə edib ki, atəş açan şəxsin nəhəng silah və sursat anbarı olub. Ona görə də faciənin nəticələri daha ağır ola bilərdi, lakin asayiş keşikçiləri bunun qarşısını ala biliblər.
 

Maraqlıdır ki, təqsirləndirilən şəxs universitetin tarix fakültəsinin tələbəsi olub və əvvəllər məhkum olunmayıb. Atışmadan sonra bütün ölkədə bir günlük matəm elan edilib.


Prezident Peter Pavel baş verənlərdən sarsıldığını bildirib və zərər çəkənlərin ailələrinə başsağlığı verib. Baş nazir Petr Fiala əlavə edib ki, bütün ölkə bu dəhşətli hərəkətdən şoka düşüb.
 

Hazırda qətlin motivi məlum olmadığından hüquq-mühafizə orqanları araşdırmaları davam etdirir.

Xanım

Sfera.az