Uşaq atada, yoxsa anada qalmalıdır? - Boşanma zamanı hansı məqamlar nəzərə alınır?
Boşanmalar zamanı ən problemli və aktual məsələlərdən biri də uşağın atada, yoxsa anada qalmasıdır. Ölkəmizdə əsasən hər hansı bir əngəl olmadığı təqdirdə övladın anaya verilməsi uyğun görülür. Bu zaman isə uşaq ata qayğısından uzaq böyümüş olur.
Bəs, bu nə dərəcədə doğrudur?
Mövzu ilə bağlı Sfera.az-a danışan hüquqşünas Səbuhi Axundov bildirib ki, boşanma zamanı valideynin iş rejimi, uşağın inkişafı və ona göstərilən münasibət məhkəmədə nəzərə alınan əsas məqamlardandır:
“Valideynlərdən birinin maddi vəziyyətinin qənaətbəxş olması uşağın onda qalması üçün əsas hesab edilmir. Məhkəmə əsasən kiçik yaşlardakı uşağın ana qayğısına ehtiyacının böyüklüyünü əsas gətirir və qərar da buna uyğun verilir. Əgər məhkəmə prosesində valideynlər arasında problem yaranarsa, məsələyə “Qəyyumluq və Himayə orqanı” cəlb olunur. Həmin orqan 10 yaşına çatmış uşaqların fikrini qiymətləndirir və müvafiq qərar verir”.
Psixoloq Ülviyyə Kərim isə mövzu ilə bağlı bildirib ki, 3 yaşına qədər uşaqlar mütləq ana himayəsində qalmalıdır:
“3 yaşından sonrakı emosional dönəmdə həm atanın, həm də ananın ayrıca rolları var. Ona görə də ayrılan cütlüklər övladları naminə dost münasibətini qoruyub saxlamalıdırlar”.
Ülkər Abdurahmanlı
