Neftin qiyməti 10 həftəlik minimumu yeniləyib.

Dünya bazarlarında neftin qiymətləri açıqlanıb.

Bu barədə Sfera.az Bloomberg-ə istinadən xəbər verir. 

ICE London qitələrarası birjasında Brent markalı neftin qiyməti 0,16% artaraq 44,82 dollar olub. Nyu-Yorkun NYMEX əmtəə birjasında keçirilən elektron ticarət əməliyyatlarının gedişində WTI neftinin qiyməti 1 barelə görə 0,07% ucuzlaşaraq 43,38 dollar təşkil edib.

APA-nın məlumatına görə, Brent markalı neftin bahalaşmasına baxmayaraq, "qara qızıl”ın qiyməti aşağı səviyyədə qalmaqdadır ki, buna da bir neçə amil təsir edir. 

Nefti ucuzlaşdıran əsas amil tələblə təklif arasında balansın pozulmasıdır. Başqa sözlə, bazarda tələbatdan təxminən 2 milyon barrel artıq neft təklif olunur.

İran və bir sıra iri istehsalçılar hasilatı artırdığı bir vaxtda, "Baker Hughes” servis şirkəti ötən həftə ABŞ-da aktiv neft buruqlarının sayının artdığını elan edib. 

Maraqlıdır ki, bu proseslər neftin qiymətlərini nizama salmağa çalışan OPEK-in Vyanadakı toplantısı ərəfəsində baş verir.

Son 3 həftə ərzində neftin qiyməti 52 dollardan 45 dollaradək azalıb. Bu isə OPEK üzvlərinin Vyanada keçiriləcək toplantıda ortaq məxrəcə gələcəyinə inamı azaldır.