Bu il xaricdən fiziki şəxslər tərəfindən Azərbaycana göndərilən pulun məbləği ötən illə müqayisədə xeyli azalıb.

Sfera.az xəbər verir ki, 2022-ci ilin 9 ayında 2,78 milyard dollar dəyərində pul vəsaiti göndərildiyi halda, bu ilin eyni dövründə 1,28 milyard dollar dəyərində pul vəsaiti göndərilib. Müqayisədən görünür ki, 2023-cü ilin 9 ayında göndərilən pulun məbləği 1,5 milyard dollar, yəni 2,17 dəfə azalıb.

Xaricdən göndərilən pulun kəskin azalmasına səbəb Rusiyadan köçürmələrin azalması ilə bağlıdır. Bu il Rusiyadan göndərilən pulların ümumi məbləği 2,7 dəfədən çox azalıb.

Ötən ilin 9 ayında Rusiyadan 2,27 milyard dollar göndərilmişdisə, cari ildə 829 milyon dollar göndərilib. Rusiyadan göndərilən pulların ümumi məbləği 1,44 milyard dollar azalıb.

Ciddi azalma ABŞ-dən göndərilən pullarda da qeydə alınıb. Son bir ildə ABŞ-dən göndərilən pullarda azalma 80,5 milyon dollar təşkil edib. ABŞ-dən ötən il 137,5 milyon dollar göndərildiyi halda, bu il 57 milyon dollar göndərilib.

Xaricdən fiziki şəxslərin göndərdiyi pulun ümumi məbləğinin kəskin azalmasına baxmayaraq mövcud məbləğ əvvəlki illərlə müqayisədə xeyli yüksəkdir. Belə ki, 2020 və 2021-ci illərin ilk 9 ayı ərzində xaricdən Azərbaycana 680-772 milyon dollar göndərilmişdi ki, bu da 2023-cü ilin nəticəsindən xeyli azdır.

Vasif