Son günlər sosial mediada gömrük limitinin 300 dollardan 150-yə endirilməsi ilə bağlı qərarın veriləcəyi iddia edilir. Bu isə vətəndaşların haqlı narazılığına səbəb olub.

Sfera.az-ın məlumatına görə, bununla bağlı fikirlərini bölüşən iqtisadçı deputat Vüqar Bayramov xatırladıb ki, bu limitlər Nazirlər Kabineti tərəfindən müəyyənləşdirilir:

“Bu limitin dəyişdirilməsi ilə bağlı bir sıra sahibkarlıq subyektləri tərəfindən müraciətlər var, amma onun aşağı salınması məqsədəuyğun deyil. Vətəndaşların aylıq 300 dollaradək sifariş etdikləri məhsullar şəxsi istehlak üçündür. Bu baxımdan, o məbləğin azaldılması və ya vergiyə cəlb edilməsi heç bir halda düzgün deyil. Digər tərəfdən, qlobal olaraq indi elektron sifarişlərin həcmində artımlar var. Yerli sahibkarlarımız da bu çağrışlara hazır olmalıdırlar”.

Deputat qeyd edib ki, sahibkarların rentabelliyi limitin azaldılması hesabına deyil, öz xərclərini minimumlaşdırmaq və xalis rəqabətə hazır olmaq yolu ilə gücləndirilməlidir: “Sahibkarların rəqabət qabiliyyətini artırmaq üçün digər və daha innovativ mexanizmlərdən istifadə imkanları hər zaman mümkündür”.

Qeyd edək ki, sonununcu dəfə 2020-ci il avqustunda gömrük limitinin məbləği 1000 dollardan 300 dollara endirilmişdi.

Günay