İsrail və HƏMAS razılaşdı: Qəzzada 4 günlük atəşkəs və girov mübadiləsi

İsrail və HƏMAS arasında gözlənilən girov mübadiləsi və atəşkəs təsdiqlənib. 

Sfera.az xəbər verir ki, bu barədə İsrailin Baş naziri Benyamin Netanyahunun ofisi açıqlama verib.

Açıqlamaya görə, HƏMAS 4 gün ərzində aralarında qadın və uşaqların da olduğu 50 girovu azad edəcək. Bu dörd günlük müddət ərzində toqquşmalar dayandırılacaq. HƏMAS-ın bəyanatına görə, İsrail 150 fələstinli qadın və uşağı azad edəcək. Atəşkəs razılaşması humanitar, tibbi yardım ləvazimatları və yanacaq yüklənmiş yüzlərlə yük maşınının Qəzzaya daxil olmasına imkan verəcək. 

HƏMAS 4 günün sonunda əlavə 10 israilli girovu buraxarsa, 1 gün daha atəşkəs elan olunacaq. Atəşkəs razılaşmadan 24 saat sonra başlayacaq.

Həmçinin, atəşkəs dövründə Qəzza zolağının cənubunda bütün gün, şimalda isə sutkada 6 saat saat 10.00-16.00 arasında hava hərəkətinin dayandırılacağı bildirilib. 

İsrailin məlumatına görə, Qəzza zolağında HƏMAS-ın silahlı qanadı olan Qəssam Briqadaları tərəfindən saxlanılan 239 israilli məhbus var.

Firuzə Əliyeva