“Ermənistan Vaşinqtonun vasitəçiliyi ilə Ukraynaya “Toçka- U” raketləri ötürməyə razılıq verib”.

Bu barədə ABŞ-nin Müharibə Araşdırmaları İnstitutu məlumat yayıb. Bildirilib  ki, belə bir iddia ilə Kremlə yaxın mənbələr çıxış ediblər:

“Amma hələ ki, bu iddianı təsdiqləyəcək sübut yoxdur. Ermənistanın Ukraynaya ötürə biləcəyi silahların sayı da məlum deyil”.

Vaşinqton niyə Ukraynanı Ermənistanın əli ilə silahlandırır?

Bununla bağlı Sfera.az-a açıqlama verən siyasi şərhçi Kənan Novruzov deyib ki, kollektiv Qərb Rusiyanın müharibədə qalib gəlməsini istəmir və bu səbəbdən də bütün imkanlardan istifadə edir:

“Sözügedən iddia reallığa uyğun olmaya da bilər. Bunun sadəcə, informasiya müharibəsinin tərkib hissəsi olması da mümkündür. Amma əsas məsələ heç də Ukraynaya “Toçka- U” raketlərinin verilməsində deyil. ABŞ bunu birbaşa, tranzit ölkədən istifadə etmədən də edə bilərdi. Lakin tranzit ölkə kimi məhz Ermənistanın seçilməsi Moskva ilə münasibətlərdəki mövcud çatların daha da dərinləşməsinə hesablanıb. Hazırda Vaşinqton üçün prioritet məhz budur”.

Müsahibimiz qeyd edib ki, ABŞ “bir daşla iki quş vurmaq” fikrindədir:

“Vaşinqtonun Ermənistanın əli ilə Ukraynanı silahlandırması prosesi gələcəkdə özünü daha açıq göstərə bilər. Bu isə dünyadakı qütbləşmənin, həmçinin Ağ Evin regionu “qaynar qazana” çevirmək istəyinin bariz təzahürüdür”.

Günay