Dünya bazarında neftin qiymətində ucuzlaşma müşahidə edilir. Sentyabr ayından bəri neftin qiymətində 16.0 faiz azalama qeydə alınıb.

Prosesin manatın məzənnəsinə necə təsir edəcəyi maraqlıdır.

Sfera.az-ın məlumatına görə, bununla bağlı fikirlərini bölüşən iqtisadçı deputat Vüqar Bayramov deyib ki, neftin dünya bazarındakı qiyməti Azərbaycanın dövlət gəlirləri baxımdan vacibdir. Onun sözlərinə görə, hazırda Azərbaycan ixracatının 80 faizə yaxınını neft məhsulları təşkil edir:

“Hazırda Azərbaycanda valyutaya olan tələbin əhəmiyyətli hissəsi Dövlət Neft Fondu tərəfindən ödənilir. Neft Fondu mövcud aktivləri hesabına illik orta hesabla 12 milyard manatlıq transferi həyata keçirmək imkanına malikdir. Bununla yanaşı, neftin qiyməti valyuta bazarına həm iqtisadi, həm də psixoloji təsir göstərir. Brent markalı neftin mövcud qiyməti valyuta bazarındakı tarazlıq üçün hələlik təhdid yaratmasa da, növbəti dövrdə “qara qızıl”ın dəyərinin necə dəyişməsi müəyyən təsirlərdən asılı olacaq”.

Millət vəkili bildirib ki, Azərbaycanda hələ üzən məzənnə rejiminə keçirilməyib:

“Mərkəzi Bank prosesə birbaşa intervensiya etmək imkanlarını qoruyub saxlayır. Ona görə də neft bazarında dəyişikliklər fonunda manatın məzənnəsinin necə dəyişməsi birbaşa Azərbaycan Mərkəzi Bankının mövqeyindən asılı olacaq”.

Günay