Payız fəsli turizm sektorunda tənəzzül ayları kimi qəbul edilir. Bu ərəfələr iş fəaliyyətinin aktiv dövrü olduğu üçün bölgələrə axın azalır.

Mövzu ilə bağlı Sfera.az-a açıqlama verən Azərbaycan Turizm Agentlikləri Assosiasiyasının ekspertlər şurasının üzvü Rəhman Quliyev paytaxtdan uzaq bölgələrdə payız turizminin nisbətən zəif olduğunu deyib. Mütəxəssis bəzi bölgələrdə bu tendensiyanın dəyişkən olduğunu qeyd edib:

"Bu gün Azərbaycanda, xüsusilə də regionlarda fəaliyyət göstərən turizm obyektlərinin, otellərin, iaşə müəssisələrinin həftəiçi fəalıq əmsalı aşağı düşür. Amma həftə sonları, eyni zamanda əlamətdar günlərdə canlanma müşahidə edilir. Quba, Qusar, Şamaxı və İsmayıllıda həftə sonları otellərdə 2-3 günlük doluluq səviyyəsi daha yüksəkdir. Şəki, Qax, Balakən və Zaqatala isə paytaxtdan qismən uzaq olduğu üçün burada doluluq səviyyəsi orta balla qiymətləndirilir. Lakin xüsusilə dağlıq bölgələrimizin füsunkar gözəlliyə malik olması tətil günlərində böyük sifarişlərin qəbul edilməsinə imkan yaradır. Eyni zamanda, əlamətdar günlərdə böyük sifarişlər olur ki, bu zaman da məsafədə asılı olmayaraq, böyük otellərin əksəriyyətində yerlər dolu olur”.

Ekspert bögələrdə turizmin inkişaf etdirilməsinin valyuta daxilolmalarına xeyrindən də danışıb:

“Hazırda paytaxt sakinlərinin bölgələrə maraq göstərməsi sevindirici haldır. Ən ucqar bölgələrdə yol infrastrukturunun yüksək səviyyədə olması da imkan verir ki, turistlərimiz rahat şəkildə Azərbaycanın istənilən bölgəsinə səyahət etsin. Bu da öz növbəsində bölgələrdə sosial inkişafa böyük təkan verir və valyuta axının ölkədən kənara getməsinin qarşısını nisbətən almış olur. Qarşıdan yeni ilə, 14 fevrala hazırlıq gəlir. Bu zaman ölkədəki otellər müxtəlif şou- proqramlarla özlərinə maraq yaradacaqlar. Bu həm əcnəbi, həm də yerli turistlərin diqqətini cəlb etməyə imkan verəcək".  

Əzizə Zeynal