Xəbər verdiyimiz kimi, bu gün Fransa Paris merinin müşayiətilə ərzaqla dolu 10 TIR-ı Qarabağın Rusiya sülhməramlılarının nəzarətində olan hissəsinə yola salıb. Maraqlıdır ki, Laçın dəhlizinə yol almış “sülh” missiyalı karvan Ağdam-Xankəndi yolundan istifadə etmək niyyətində deyil.

Maraqlıdır, Fransa bu addımı atmaqla nəyə nail olmağa çalışır?

Mövzu ilə bağlı Sfera.az-a açıqlama verən deputat Cavid  Osmanov Fransanın Azərbaycana qarşı qərəzli mövqe nümayiş etdirdiyini deyib. Parlamentari Fransanın Təhlükəsizlik Şurasının toplanması üçün hərəkətə keçdiyini də sözlərinə əlavə edib:

“Fransa açıq formada ermənipərəst mövqedən çıxış edərək hər zaman Azərbaycana qarşı qərəz nümayiş etdirir. 44 günlük Vətən müharibəsindən əvvəl və elə həmin dönəmdə də Azərbaycana təzyiq göstərib, haqlı yolundan döndərməyə çalışıb. Amma Prezident İlham Əliyev bu təzyiqlərə qətiyyətlə cavab verdi. Vətən müharibəsi bitəndən sonra Fransa Senatının həm yuxarı, həm də aşağı palatasının Azərbaycana qarşı qərəzli qətnamələr çıxarması və çirkin kampaniya aparması göz önündədir. Ümumilikdə Fransa hakimiyyəti Ermənistana dəstək üçün hər fürsətdə Azərbaycana təzyiq göstərməyə çalışır.

BMT Təhlükəsizlik Şurasının Laçın dəhlizi ilə bağlı son müzakirələrində də müşahidə etdik ki, Fransa açıq şəkildə Ermənistana dəstək nümayiş etdirdi. İndi isə Fransa Təhlükəsizlik Şurasında Azərbaycana qarşı müzakirə aparılmasını təşkil etmək istəyir. Bir neçə gün öncə Emmanuel Makronun ölkəmizə qarşı qərəzli çıxışı bunu bir daha göstərir”.

Millət vəkili Fransanın “humanitar yardım” təşəbbüsünə başqa ölkələrin də qatıla biləcəyini qeyd edib:

“Fransanın Ermənistana humanitar yardım planı sadəcə təxribatdır. Fransa humanitar addım atmaq qabiliyyətində olan ölkə deyil. Bu ölkənin Əlcəzairdə və digər yerlərdə apardığı kolonial siyasət, törətdiyi qanlı qətliamlar, açıq şəkildə separatçılara dəstək göstərməsi bunun bariz nümunəsidir. Fransa humanitar yardım adı ilə Azərbaycana qarşı təxribat törətməyə çalışacaq. Onlar çalışacaq ki, bir neçə ölkəni də bu məsələyə cəlb etsin. Lakin bu plan iflasa uğrayacaq, çünki Azərbaycan qətiyyətli mövqeyini davam etdirəcək. Fransa və onun kimi ölkələr yaxşı bilməlidirlər ki, Azərbaycanla təzyiq dilində danışmaq mümkün deyil, Azərbaycan güclü dövlət, haqlı tərəfdir. Haqlı mövqeyimizi isə sonadək davam etdirəcəyik”.

Əzizə Zeynal