ABŞ bəzi MDB ölkələrinə sanksiya tətbiq edə bilər – Hədəfdə olan ilk ölkə budur 

ABŞ Rusiya ilə ticarət əməliyyatlarını məhdudlaşdırmaq üçün Qırğızıstana təzyiq göstərməyə başlayıb. Rəsmi Vaşinqton bununla bağlı sanksiya tədbirlərini də nəzərdən keçirir. 

Sfera.az xəbər verir ki, belə bir iddia ilə “The Washington Post” nəşri çıxış edib. 

Qəzetə danışan Co Bayden administrasiyasının rəsmilərindən biri söyləyib ki, ABŞ bu həftədən etibarən Qırğızıstana qarşı tədbirlər görə bilər:

"Qırğızıstan Rusiya şirkətlərini ikili təyinatlı mallar, o cümlədən Çin pilotsuz təyyarələri ilə təmin edir. Ticarət sənədlərinə görə, fevral və mart aylarında Qırğızıstan şirkətləri Çin və Cənubi Koreyadan “həssas” elektronika, o cümlədən yarımkeçiricilər və gərginlik gücləndiriciləri alıb, eyni müddətdə həmin mallar Qırğızıstandan tərəfindən Rusiyaya ixrac olunub”. 

Bu ittihamlara cavab olaraq Qırğızıstanın Vaşinqtondakı səfirliyi qəzetin suallarını cavablandırıb. Diplomatik nümayəndəlik sanksiyaların pozulması hallarını etiraf edib. Lakin səfirlik real iqtisadi vəziyyəti nəzərə almalarının vacib olduğunu da vurğulayıb. 

Xatırladaq ki, Qırğızıstanla yanaşı Ermənistan və Qazaxıstan da Rusiyanın sanksiyalardan yayınmasına kömək edir. 

İki ay əvvəl “Financial Times” yazmışdı ki, Avropa İttifaqından Ermənistan, Qazaxıstan və Qırğızıstana satılan malların bəziləri Rusiya ərazisindən daşınan zaman mənzil başına çatmır. Mayda təxminən 1 milyard dollar dəyərində mal adıçəkilən ölkələr tərəfindən alınsa da onlar Rusiyada götürülüb. 

Avropa İttifaqı rəsmilərinin fikrincə, bu məhsullar potensial hərbi və ya kəşfiyyat məqsədləri üçün istifadə oluna bilər. 

Bir müddət öncə “Wall Street Journal” da yazmışdı ki, bir sıra keçmiş Sovet respublikası Rusiyanın əldə etdiyi ABŞ və Avropa istehsalı olan kompüter çipləri, lazerlər və digər mülki və hərbi təyinatlı məhsulların əsas daşınma məntəqələrinə çevrilib. Nəşrin məlumatına görə, bu səbəbdən ABŞ və Avropa İttifaqından Ermənistan, Gürcüstan, Qırğızıstan, Özbəkistan və Qazaxıstana malların ixracı kəskin artıb. 2021-ci ildə 14,6 milyard dollar olan ixrac 2022-ci ildə 24,3 milyard dollara yüksəlib. 
Həmin ölkələrin ABŞ və Avropa İttifaqından idxalı kəskin artdığı kimi Rusiyaya ixracı da xeyli artıb. Bu ölkələr ötən il Rusiyaya ixracı təxminən 50% artıraraq 15 milyard dollara çatdırıb. 

ABŞ rəsmiləri hesab edir ki, MDB-nin adıçəkilən ölkələri Rusiyaya sanksiyaların təsirlərinin azaldılmasında kömək göstərirlər. Buna görə də həmin ölkələrin bəzi şirkətlərinə sanksiyalar tətbiq edilib. Konkret olaraq aprel ayında Ermənistan və Özbəkistan firmaları məhdudiyyətlərə məruz qalıb. 

ABŞ rəsmisi istisna etməyib ki, rəsmi Vaşinqton bu səbəbdən Rusiyaya qadağan olunan malları satan ölkələrə qarşı sanksiyaları genişləndirə bilər. 

Vasif