"Azərbaycan 169 ölkə arasında kibertəhlükəsizlik üzrə 15 pillə irəliləyib" - Elmir Vəlizadə
Azərbaycan 169 ölkə arasında kibertəhlükəsizlik üzrə 15 pillə irəliləyib.
Sfera.az xəbər verir ki, bunu Sosial Tədqiqatlar Mərkəzinin Avropa Birliyi və Avropa Şurası ilə birgə tədqiqat layihəsinin nəticələrinin təqdimatı ilə bağlı konfransda çıxışı zamanı Azərbaycan Respublikası Prezidenti Administrasiyasının Qeyri-hökumət təşkilatları ilə iş və kommunikasiya şöbəsinin sektor müdiri Elmir Vəlizadə bildirib.
O, kiberhücumların səbəblərindən danışıb:
"Azərbaycanın dövlət siyasətində İKT-nin inkişafı prioritetlər sırasındadır. Bunun sırasında kibertəhlükəsizlik qüvvədədir. Bütün dünyada kibercinayətkarlıq geniş yayılmasına baxmayaraq, indiyədək BMT səviyyəsində müvafiq saziş qəbul olunmayıb. Nəhayət 2019-cu ildə BMT belə bir sazişin imzalanmasına razılıq verib, 2020 ci ilin martında bu istiqamətdə konfrans da keçirilib. Ölkəmizdə kibertəhlükəsizlik sahəsində keçirilən siyasət qabaqcıl texnologiyaya uyğundur. Ümumilikdə kibertəhlükəsizlik hər bir iştirakçının bilik səviyyəsindən başlayır.
Baş verən kiberhücumların 95 faizinin əsas səbəbi insan amilidir. Bu baxımdan təqdim olunan hesabatda kibertəhıükəsizıiyin təlqin edilməsi üzrə düzgün tövsiyələr verilir. Xüsusən, İkinci Qarabağ müharibəsi dövründə əsasən sərhədyanı bölgədə ermənilər rabitə vasitəsilə bankların adından, dövlətin adından yalan məlumatlar yayırdılar. Lakin bunun qarşısı dövlət tərəfindən alınmışdı".
Əzizə Zeynal
Fotolar: Anar Bayramlı
