Hər bir dövlətin milli həmrəyliyinin təminatı üçün vahid, milli ideoloji xəttin mövcudluğu labüddür. Ölkəmizdə azərbaycançılıq ideologiyası milli həmrəyliyin əsas amilinə çevrilib və bu proses günü-gündən daha da sürətlənir, əhatə dairəsi genişlənir.

Azərbaycançılıq məfkurəsi əsasən ümummilli lider Heydər Əliyevin dövründən praktiki faydalılığını xüsusilə göstərməyə başlayıb. Bu ideologiyanın faydalılığını nümayiş etdirən ən bariz nümunə isə 44 günlük Vətən müharibəsində büsbütün azərbaycançılıq ideologiyasına bürünən gənclər oldu.

Azərbaycançılığı milli ideologiyaya çevirməklə cəmiyyətin birliyinə, xalqın vahid ideya ətrafında toplaşmasına nail olunmasında Prezident İlham Əliyevin xüsusi xidmətləri var. Məhz İlham Əliyevin siyasəti sayəsində milli-mənəvi və bəşəri dəyərlər artıq azərbaycançılıq ideologiyasının özəyini, onun əsas təməl prinsiplərini təşkil edib. Azərbaycançılıq ümumbəşəri dəyərlərdən yetərincə bəhrələnməklə bərabər, öz milli mentallığını qoruyub saxlamaqdadır.

Tarix elə şərtlər yaradıb ki, dünya azərbaycanlılarının yalnız təqribən beşdə biri müstəqil Azərbaycan Respublikasının vətəndaşıdır. Xeyli sayda soydaşımız hazırda dünyanın müxtəlif ölkələrində cəmləşib. Buna rəğmən, qlobal dəyərlərin böyük əhəmiyyət kəsb etdiyi bir dövrdə azərbaycanlıların müxtəlif dövlətlərin vətəndaşları olması onların milli birliyi üçün maneə yaratmamaqdadır. Bu gün dünyanın harasında yaşamasından asılı olmayaraq, hər bir soydaşımız Azərbaycançılıq ideologiyasından güc alaraq, ölkəmiz haqqında həqiqətlərin dünya ictimaiyyətinə çatdırılmasında fəal iştirak etməlidir. Bunu biz 44 günlük savaş dönəmində gördük, Xocalı, 20 Yanvar faciəsinin ildönümlərində həqiqətin səsini duyurmaq üçün birlik olan soydaşlarımızın timsalında görə bilirik.

Eyni zamanda, azərbaycançılığın əsas istiqamətlərindən olan gənclərin milli ruhda tərbiyəsi xaricdəki soydaşlarımızın da daim diqqət mərkəzində olmalıdır. Xüsusilə də Azərbaycandan kənarda, ayrı-ayrı xarici ölkələrdə dünyaya gələn azərbaycanlı gənclərin öz ana dilində yazıb-oxuya bilməsi istiqamətində fəaliyyətə diqqət yetirmək lazımdır. Bunun üçün dövlətimiz tərəfindən də davamlı islahatlar aparılmaqdadır. Azərbaycançılıq ideologiyasının dünyada təbliğ edilməsində həm də diaspora təşkilatları tərəfindən sistemli iş aparılır. Azərbaycanda oturuşmuş multikultural dəyərlər, konfessiyalar arası dini dözümlülük beynəlxalq təşkilatlar tərəfindən dəstəklənir. Bu, hətta bir çox ölkələrə nümunə olaraq da göstərilir. Harada yaşamasından asılı olmayaraq, hər bir azərbaycanlı, azərbaycançılıq ideologiyasının təbliğatçısına çevrilməli, onun mahiyyətini izah etməyi bacarmalıdır.

Azərbaycançılıq ideologiyasının təbliği bu gün ölkəni ayaqda saxlayan və eyni zamanda dövlətlə vətəndaş arasında körpü yaradan əsas təməl sütunlardan biridir.

İnci

Qeyd: Məqalə Medianın İnkişafı Agentliyinin maliyyə dəstəyi ilə hazırlanıb.

Mövzu: Azərbaycançılıq ideyasının təbliği